बाँके पुस २३ गते ।
नेपालगन्जमा अत्यधिक चिसो बढेपछि जनजिवन प्रभावित भएको छ । चिसोले विशेषगरी बालबालिका, बृद्धबृद्धा, दम रोगका विरामी र गरिवीको रेखामुनी रहेका समुदाय बढि प्रभावित भएका छन् ।
चिसोले यो समुदाय प्रभावित भए पनि नेपालगन्ज उपमहानगरपालिका भने बेखवर छ । चिसो बढेपछि न्यानोका लागि बाल्न दाउरा वितरण गर्ने परम्परा भए पनि यसपाली नेपालगन्ज उपमहानगरले कुनै चासो नदेखाएको भन्दै सर्वसाधारणले आक्रोस ब्यक्त गरेका छन् ।
नेपालगन्ज उपमहानगरपालिका ५ का सलिम अहमदले नेपालगन्ज उपमहानगरले गरिव, असहाय, बृद्धबृद्धा र विरामीको जनजिवनमा खेलवाड गरेको बताए । उनले भने, ‘चिसोले जनजिवन प्रभावित छ । न्यानोका लागि आगोको सहारामा जिउने गरिव, असहाय, बालबालिका, बृद्धबृद्धा र दम रोगका विरामी प्रत्यक्ष प्रभावित भएपनि नेपालगन्ज उपमहानगरपालिका बेखर जस्तै गरि कानमा तेल हालेर सुतेको छ । योभन्दा दुखदायी अरु हुन सक्दैन ।’
नेपालगन्ज उपमहानगरपालिका ६ का बिबेक अधिकारीले पनि नगरबासीलाई चिसोबाट जोगाउन नेपालगन्ज उपमहानगरले चासो नदिएको बताए । नेपालगन्ज उपमहानगरको कार्यशैली प्रति असन्तुष्टि जनाउँदै तत्काल दाउरा वितरण गर्न माग गरे । ‘नेपालगन्जका जनप्रतिनिधिले गैरजिम्मेवारीपना देखाउँदा नगरबासी चिसोबाट मर्ने अवस्था सिर्जना भएको छ,’ उनले भने ।
शितलहरले नेपालगन्जको मुख्य बजारमा समेत सर्वसाधारणको आउजाउ पातलिएको छ । चिसोसँगै चल्ने हावाले रुघाखोकी र ज्वरोका विरामी बढ्दो छ । नेपालगन्जको भेरी अस्पतालमा चिसोका विरामीको संख्या अत्यधिक बढेको अस्पतालका सूचना अधिकारी समेत रहेका कन्सल्टेन्ट फिजिसियन डा. संकेत रिसालले बताए ।
उनले चिसो बढेपछि रुघाखोकी, ज्वरो, टाइफाइड र दम रोगका विरामीको संख्या बढेको बताए । उनले चिसोबाट जोगिन अति जरुरी काम बाहेक अन्य काममा घरबाट बाहिर ननिस्कन, न्यानो लुगा लगाउन र तातो झोलिलो खानेकुरा खान सुझाव दिएका छन् । ‘कोठा न्यानो बनाउने नाममा कोठामा आगो बाल्दा र हिटर बालेर सुत्दा स्वास प्रश्वासमा समस्या आउँदा स्वास्थ्य अवस्था विग्रिन सक्छ,’ उनले भने, ‘आगो र हिटर बाल्दा हावा पास हुने कोठा हुन आवश्यक छ । यस्तो भएन भने निसासिएर ज्यान जान पनि सक्छ । यसतर्फ सजग हुन आवश्यक छ ।’
Discussion about this post