बाँके चैत ३ गते ।
लागु औषध नियन्त्रणलाई प्राथमिकतामा राखेको बाँके प्रहरीले एक महिनामा एक किलो १०६ ग्राम ४१६ मिलिग्राम ब्राउनसुगर बरामद गरेको छ । बाँकेको नेपालगन्ज लागु औषध ओसारपसार तथा सेवनको ट्रान्जिट प्वाइन्ट बन्न थालेपछि बाँके प्रहरीले यसलाई प्राथमिकतामा राखेको बाँकेका प्रहरी प्रमुख एसपी तुलबहादुर कार्कीले बताए । उनले लागु औषध नियन्त्रणका लागि मुख्य नाका जमुनाह र अन्य सहायक नाकामा कडाई गरिएको बताए । ‘लागु औषध बाँकेको प्रमुख सुरक्षा चुनौति बनेको छ । योे नियन्त्रण गर्न बाँके प्रहरी तदारुकताका साथ काम गरिरहेको छ,’ उनले भने ।
फागुन महिनामा गरेको प्रगति विवरण पत्रकार माझ सार्वजनिक गर्दै जिल्ला प्रहरी कार्यालय बाँकेका प्रहरी प्रवक्ता डिएसपी दिपक पातलीले एक महिनामा पाँच हजार ट्याब्लेट ट्रामाडोल र चार किलो दुई सय ग्राम चरेशसहित २२ जना ओसारपसारमा संलग्नलाई पक्राउ गरि कारवाही प्रक्रिया अगाडी बढाइएको जानकारी दिए । उनले ६५ जना फरार अभियुक्तलाई पक्राउ गरि १५ वर्ष दुई महिना १८ दिन कैद भुक्तान गरिएको बताए । फरार अभियुक्तबाट चार लाख ३५ हजार ५५ रुपैयाँ जरिवाना असुल गरिको बताए । ‘फागुन महिनामा एक सय ३१ वटा मुद्धा दर्ता भएको थियो । जस मध्ये एक सय दुई जनालाई पक्राउ गरि कानुनी दायरामा ल्याइएको छ,’ उनले भने, ‘एक महिनामा माघ महिनामा फच्यौट हुन बाँकी रहेका ६५ वटा मुद्धा पनि फच्यौट गरिएको छ ।’
उनले फागुन महिनामा चार सय १४ वटा ठाडो उजुरी दर्ता भएकोमा तीन सय ९६ वटा फच्यौट भएको तथ्यांक पत्रकार माझ सार्वजनिक गरे । उनले एक महिनामा १४ लाख ७१ हजार ८७५ रुपैयाँ बराबरको अवैध सामान बरामद गरि नेपालगन्ज भन्सार कार्यालयमा दाखिला गरेको बताउँदै ट्राफिक नियम उलंघन गर्ने सवारी साधनबाट २९ लाख ११ हजार पाँच सय रुपैयाँ राजस्व संकलन गरिएको जानकारी दिए । उनले भने, ‘एक महिनामा तीन लाख ७६ हजार ८१० रुपैयाँ बराबरको अवैध कुखुरा बरामद गरि क्वारेन्टाइन कार्यालयमा बुझाइएको छ ।’
बाँके प्रहरीले सीमानाकाबाट ८१ जना महिला, बालबालिका तथा जेष्ठ नागरिकको उद्धार गरि परिवारको जिम्मा लगाइएको र अलपत्र अवस्थामा फेला परेका १५ जनालाई संरक्षणका लागि विभिन्न संस्थामा पठाइएको बताए ।
हराएका तीन वटा मोटरसाइकल, एक साइकल र २१ थान मोवाइल फेला पारि सम्बन्धित निकायलाई बुझाएको बाँके प्रहरीले जनाएको छ ।
स्थानियलाई सचेत बनाउन बाँके प्रहरीले एक सय ६० वटा सचेतना अभियान समेत संचालन गरेको छ । बाँके प्रहरी प्रवक्ता पातलीका अनुसार, बाँकेका विभिन्न क्षेत्रमा ट्राफिक नियम, लैंगिक हिंसा, लागु औषध दुरुपयोग, साइबर अपराध, चोरी लगायतका सचेतनामुलक कार्यक्रम संचालन गरिएको छ । ‘गत फागुन महिनामामात्र ट्राफिक नियम अन्तरगत लेन अनुशासन, जेब्रा क्रसिङ, ट्राफिक लाइट लगायत दुई सय ५१ वटा सचेतनामुलक कार्यक्रम गरिएको छ,’ उनले भने ।
Discussion about this post