जाजरकोट चैत २० गते ।
जाजरकोटको छेडागाड नगरपालिका–८ का बालबालिकालाई वडा भित्रकै विद्यालयमा भर्ना नगरे अभिभावक सरकारी सेवाबाट वञ्चित हुने भएका छन् । नगरपालिकाको कार्यपालिका बैठकले आगामी शैक्षिक सत्रदेखि लागू हुनेगरी सो निर्णय गरेको हो ।
वडा शिक्षा समिति बैठकको यो निर्णयपछि वडाभित्र बसोबास गर्ने सबैले अनिवार्य रुपमा आफ्ना बालबालिकाहरुलाई आफ्नै वडाभित्रका विद्यालयहरुमा भर्ना गरी अध्यापन गराउनुपर्ने भएको छ । यो निर्णय जसरी भए पनि लागू गर्ने वडाको तयारी छ । वडा सचिव बासुदेव खत्रीले यो निर्णयलाई उल्लङ्घन गर्ने र आफूखुसी आफ्ना बालबालिकाहरुलाई अन्यत्र भर्ना गरेको पाइए वडाबाट पाइने सरकारी सेवाबाट वञ्चित गर्ने निर्णय भएकोे जानकारी दिए ।
वडा अध्यक्ष सत्यनारायण गिरीले वडा भित्रका सामुदायिक विद्यालयको शैक्षीक गुणस्तर वृद्धि गर्नका लागि यो निर्णय गर्नुपरेको बताए । सबैको सामुदायिक विद्यालय प्रतिको अपनत्व रहोस् भन्ने उद्देश्यले यो निर्णय गर्नु परेको वडाअध्यक्ष गिरीको भनाइ छ । वडा कार्यालयले हालै आफ्नो वडा भित्र रहेका सम्पूर्ण विद्यालयका प्रधानाध्यापक, शिक्षक, जनप्रतिनिधि लगायतसँग समेत यस विषयमा छलफल गरेर निर्णय गरेको हो । सबैको उपस्थितिमा यो निर्णय भएको हुनाले यसलाई कार्यान्वयन गर्न समस्या नहुने वडाको दाबी छ ।
साथै वडाले आफ्नो वडामा कार्यरत सबै शिक्षक कर्मचारीहरुले पूर्णरुपमा कक्षाकोठामा शिक्षण सिकाइका विधिहरु प्रयोग गरी समयको सही सदुपयोग गरे नगरेको प्रधानाध्यापकबाट निरीक्षण तथा अनुगमन गर्ने निर्णय समेत गरेको छ ।
Discussion about this post