बर्दिया जेठ ४ गते ।
दुई सातायता बर्दियामा अत्यधिक गर्मीले जनजीवन प्रभावित भएपछि गुलरिया नगरपालिकाले बिहानबाट विद्यालय सञ्चालन गर्न निर्देशन दिएको छ । पालिकाको शिक्षा शाखाले आजदेखि बिहान ६ देखि दिउँसो ११ बजेसम्म विद्यालय सञ्चालन गर्न सम्बन्धित विद्यालयलाई निर्देशन दिएको हो ।
नियमित पिरियडअनुसार कक्षा सञ्चालन गर्न निर्देशन दिइएको शिक्षा शाखा प्रमुख सतिश यादवले बताए । अत्यधिक गर्मीले विद्यार्थी र शिक्षकलाई दिउँसो पठनपाठन गर्दा समस्या भएकाले बिहानको कक्षा सञ्चालन गर्न लागिएको हो,’ उनले भने, ‘मौसममा सुधार नभएसम्म बिहान विद्यालय सञ्चालन हुने छ ।’ केही समययता चर्को घामले मानिसहरु आवश्यक कामबाहेक घरबाहिर निस्कन छाडेका छन् ।
दिउँसोको तापक्रम औसत ३८ देखि ४२ डिग्री पुग्ने गरेको छ ।अत्यधिक गर्मीले रक्तचाप, घाउ खटिरा, टाउको दुख्ने, झाडापखाला, ज्वरोका बिरामीको संख्या अत्यधिक बढेको जिल्ला अस्पताल गुलरियाले जनाएको छ । विशेषगरी बढी बालबालिकामा झाडापखाला देखिएको जिल्ला अस्पताल बर्दियाका बाल रोग विशेषज्ञ डा.विश्वनाथ शाहले बताए । शरीरबाट अत्याधिक पसिना बग्ने भएकाले प्रशस्त पानी र झोल पदार्थ बढी खान चिकित्सकले सर्वसाधारणलाई सल्लाह दिएका छन् ।
Discussion about this post