बाँके जेठ २२ गते ।
वातावरण दिवसको अवसर पारेर नेपालगन्जको न्यूरोडमा बृक्षा रोपन गरिएको छ । समाजसेवी ग्रेस रौनियार कनोडियाको सहयोगमा क्लिन नेपालगन्ज, ग्रिन नेपालगन्जले ५० वटा बेगनबेली फुलको विरुवा लगाएको हो ।
आफ्नो १४ महिने छोरालाई वातावरण र पर्यावरण तथा प्लाष्टिक एवम् प्लाष्टिकजन्य बस्तु प्रयोग गर्न हुँदैन भन्ने शिक्षा दिन बेगनबेली फूलको विरुवा उपलब्ध गराएको उनले बताइन् । ‘बच्चालाई सानैदेखि वातावरण र पर्यावरणको बारेमा शिक्षा दिनुपर्ने महशुस भएर क्लिन नेपालगन्ज, ग्रिन नेपालगन्जको अभियानमा जोडिएकी हुँ,’ उनले भनिन्, ‘मेरो छोरा १४ महिनाको छन्, म उनलाई सानैदेखि वातावरण र पर्यावरणबाट हुने फाइदा सिकाउन चाहन्छु ।
घरपालुवा जनावर कुकुर, विरालोसँग घुलमिल होवस भन्ने हेर्न चाहन्छ । सानैदेखि सिकाए भने उनलाई वातावरण संरक्षणमा लाग्ने प्रेरणा मिल्नेछ ।’ उनले नेपालगन्जको बुहारी भएको नाताले नेपालगन्जमा हरियाली भएको र सफासुग्घर भएको हेर्न चाहेको बताइन् । ‘म काठ्माडौँमा जन्मिए, हुर्किएँ र शिक्षा, दिक्षा पनि त्यतै लिएँ । अव मेरो कर्मथलो नेपालगन्ज भएको छ । म नेपालगन्जलाई सुन्दर भएको हेर्न चाहन्छु,’ उनले भनिन् ।
बृक्षा रोपन कार्यक्रममा क्लिन नेपालगन्ज, ग्रिन नेपालगन्जका अध्यक्ष डा. विनोद कर्णले विगत तीन वर्षदेखि रोकिएको अभियानलाई फेरि निरन्तरता दिन लागेको बताए । उनले दुई वर्ष कोरोना र डेढ वर्ष ब्यक्तिगत समस्याका कारण अभियानमा बाधा पुगेको बताए । ‘नेपालगन्जलाई सफा र हरियाली बनाउने अभियान आजबाट फेरि सुरु भएको छ,’ उनले भने, ‘विविध कारणले साढे तीन वर्ष अभियान रोकिन गयो, अव कुनै हालतमा रोकिने छैन ।’
उनले अहिलेसम्म नेपालगन्जमा झण्डै एक हजार विरुवा रोपिसकेको बताए । सुर्खेतरोड, न्यूरोड, विभिन्न विद्यालय र सार्वजनिक स्थलमा फुल तथा फुलजन्य विरुवा रोपेको बताउँदै उनले पहिले रोपेको विरुवा मरेको ठाउँमा वातावरण दिवसको अवसर पारेर रोपेको जानकारी दिए । ‘नेपालगन्जलाई सुन्दर र हराभरा बनाउने अभियानमा जोडिन सवैलाई मेरो आग्रह छ,’ उनले भने ।
Discussion about this post