बाँके जेठ २२ गते ।
बाँकेमा लागु औषध विरुद्ध बाँके प्रहरीले सक्रियता देखाएको छ । हिंजोआज दैनिक जस्तो लागु पदार्थ दुव्र्यसनीकर्तादेखि कारोवारीहरु धमाधम पक्राउ परिरहेका छन् । जसले गर्दा बाँकेमा लागु औषध विरुद्ध बाँके प्रहरीको सक्रियता पुष्टि गर्दै आएको छ ।
पछिल्लो पटक नेपालगन्ज उपमहानगरपालिका वडा नं.१४ भवानीपुरका १८ वर्षीय सुनिल खटिक ब्राउन सुगरसहित पक्राउ परेको बाँकेका प्रहरी प्रवक्ता डिएसपी दिपक पातलीले जानकारी दिए । उनलाई १०३ ग्राम ९०० मिलिग्राम ब्राउन सुगरसहित प्रहरीले पक्राउ गरेको डिएसपी पातलीले बताए । उनलाई जिल्ला प्रहरी कार्यालयले म्याद थप गरेर अनुसन्धान सुरु गरेको पनि उनले जानकारी दिए ।
खुला सीमानाकाको फाइदा उठाउँदै लागु पदार्थ कारोवारीहरुले लागु औषध भित्र्याउने गरेका छन् । प्रहरीले सीमा नाकामा कडाइ गरेपछि कारोवारीहरु पक्राउ पर्दै गएको प्रहरी प्रमुख राम प्रसाद घर्ती मगर बताउँछन् । उनले सबै नाकाहरुमा आफ्नो युनिटलाई सक्रियता बढाउन निर्देशन समेत दिँदै आएका छन् ।
नेपालगन्ज लागु औषधको ट्रान्जिट प्वाइन्टका रुपमा चिनिन्छ । यहाँबाट लुम्विनी, कर्णाली र सुदूरपश्चिम प्रदेशका विभिन्न जिल्लाहरुमा लागु पदार्थ पुग्ने गरेको प्रहरी अनुसन्धानले देखाउने गरेको छ ।
बढ्दो वेराजगार, साथीभाइको लहलहीमा लागेर दुव्र्यसनमा फस्नेक्रम बढ्दै गएको भन्दै प्रहरीले आफ्ना छोराछोरीमाथि निगरानी बढाउन आग्रह गर्दै आएको छ भने दुव्र्यसन नियन्त्रणका लागि स्थानीय सरकार, विभिन्न संघसंस्थासँग सहकार्य गरेर जनचेतनामुलक कार्यक्रम पनि चलाउँदै आएको छ ।
Discussion about this post