बर्दिया असार ९ गते ।
मुलुककै दुर्लभ वन्यजन्तुमा सूचीकृत कृष्णसार एक वर्षयता २६ वटा बढेर २ सय ५५ वटा पुगेका छन् । गत आर्थिक वर्ष ०८०/०८१ मा २ सय २४ कृष्णसार वटा थिए । २ सय ५५ वटा कृष्णसारमध्ये भाले ४८, पोथी १ सय ६२ र बच्चा ४१ र पहिचान नहुन सकेका(भाले र पोथी) ४ वटा रहेका छन् । फ्याउरो, स्यालको आक्रमणमा १९ वटा कृष्णसार मारिएका थिए ।
तीमध्ये एउटालाई कुकुरले मारेको छ । यस आवमा कृष्णसार बढ्नुका कारण पर्याप्त घाँसे मैदान, पिउने पानीको व्यवस्थाले बाहिर निस्कन नपरेको र नियमित गस्तीसँगै अनुगमन नै भएको संरक्षण क्षेत्रका निमित्त प्रमुख रामु केसीले बताए । कृष्णसार बर्दियाको गुलरिया नगरपालिका–२ खैरापुर क्षेत्रमा फैलिएर रहेका छन् ।
गत आवमा चितुवाको आक्रमणमा ७ वटा कृष्णसार मारिएका थिए । यस आवमा भने चितुवाको आक्रमण भएको छैन । गत आवमा भाले ४३, पोथी १ सय ३७ र बच्चा ४४ गरी २ सय २४ थिए । ‘विगतमा संरक्षण क्षेत्रमा चितुवा, हुँडार र भुस्याहा कुकुरको आक्रमणले दर्जनौँ कृष्णसार मारिएका थिए,’ उनले भने, ‘अहिले नियमित गस्तीसँगै चितुवा, भुस्याहा कुकुर र हुँडार लखेट्न थालेपछि संख्या बढ्दै गएको हो ।’ एक वर्षयता चितुवा, हुँडार, कुकुर र प्राकृतिक कारणबाट कृष्णसारको मृत्यु भएको छ ।
संरक्षण समितिका अध्यक्ष दीपेन्द्र यादवले कृष्णसार जोगाउन संरक्षित क्षेत्रमा अनाधिकृत रुपमा बसेको बस्ती हटाउनुपर्ने बताए । वास्तविक भूमिहीन छानबिन गरी उनीहरुको व्यवस्थापन हुनुपर्ने उनको भनाइ छ । ७ सय ८ बिघा क्षेत्रफल रहेको संरक्षित क्षेत्रमा ३ सय ५० बिघा बढी जग्गा भूमिहीनका नाममा घर जग्गा भएकाले समेत अतिक्रमण गरेको कृष्णसार संरक्षण समितिले जनाएको छ ।
यस क्षेत्रमा ०२६ सालदेखि ५१ घर ऐलानी जग्गामा बस्दै आएका छन् । १ सय ४१ बिघा ऐलानी जग्गामध्ये ३३ हेक्टरमा ५१ घर परिवार बसेका छन् । पर्यटकलाई आर्कषण गर्ने सम्भावना बोकेको संरक्षित क्षेत्रमा कतैबाट पहल हुन नसकेको स्थानीय बताउँछन् । सरकारले ०६५ साल चैत ३ गते कृष्णसार संरक्षण क्षेत्र घोषणा गरेको थियो ।
Discussion about this post