काठमाडौं भदौ ९ गते ।
प्रहरीको कार्यदक्षता सम्बन्धी सबैभन्दा ठुलो मूल्याङ्कन ‘प्रहरी ब्याटन’ सुरु भएको छ । प्रहरी अतिरिक्त महानिरीक्षक (एआईजी) डा. मनोज कुमार केसीले नेपाल प्रहरी कार्य दक्षता मूल्याङ्कन समितिको नेतृत्व गरेका छन् ।
प्रहरी दिवसमा पुरस्कृत गर्ने गरी हरेक वर्ष चौकीदेखि प्रदेश प्रहरी कार्यालयसम्म निरीक्षण गरेर कार्यदक्षता मूल्याङ्कन गर्ने गरिन्छ । मूल्याङ्कन टोलीले सोमबार जिल्ला प्रहरी कार्यालय झापाको निरीक्षण गरेको छ ।
मूल्याङ्कनमा उत्कृष्ट हुने प्रहरी कार्यालयलाई यसवर्ष आयोजना हुने ७० औँ प्रहरी दिवसमा ‘प्रहरी ब्याटन’ प्रदान गरिन्छ । ब्याटन प्राप्त गर्न ७ वटा प्रदेश प्रहरी कार्यालय र उपत्यका प्रहरी कार्यालयको बिचमा प्रतिस्पर्धा हुन्छ ।
केन्द्रीय मूल्याङ्कन समितिको सिफारिसको आधारमा प्रहरी प्रधान कार्यालयले हरेक वर्ष उत्कृष्ट व्यवस्थापक, उत्कृष्ट सिर्जनशील कार्य, उत्कृष्ट अनुसन्धानकर्ता र उत्कृष्ट विपद् व्यवस्थापकहरूलाई पुरस्कृत गर्दै आएको छ ।
प्रहरी कार्य दक्षता मूल्याङ्कन (प्रहरी ब्याटन) अन्तर्गत स्थलगत अनुगमनमा जाँदा १० बुँदे आचार संहिता लागु गरिएको छ । आचार संहिता तयार गरेर अनुगमन हुने कार्यालयहरूमा सर्कुलर गरिएको प्रहरी प्रधान कार्यालयका एक जना अधिकृतले जानकारी दिए ।
प्रदेश समन्वय विभागका प्रमुख तथा मूल्याङ्कन समितिका संयोजकक एआईजी डा. मनोज केसीले नयाँ आचार संहिता बनाएर लागु गरेका हुन् । मूल्याङ्कनमा खटिएका एआईजी नेतृत्वको टोलीलाई प्रहरी कार्यालयहरूले आफ्नो जिल्लाको सिमाना तथा बिच बाटोमा स्वागत गर्न पाउँदैनन् । आचार संहितामा भनिएको छ, ‘सिमाना तथा बिच बाटोमा स्वागत स्वीकार नगर्ने ।’
कार्यदक्षता मूल्याङ्कनको क्रममा स्थलगत अनुगमन पुरा भएपछि मायाको चिनो प्रदान गर्न निषेध गरिएको छ । मूल्याङ्कनमा प्रभावमा पार्ने गरी मायाको चिनो लिन र दिन निषेध गरिएको प्रहरी अधिकृतहरू बताउँछन् । आचार संहितामा भनिएको छ,‘कार्यदक्षता मूल्याङ्कनको क्रममा मायाको चिनो स्वीकार नगर्ने ।’
त्यस्तै मूल्याङ्कन समितिका सदस्यहरू हिँड्दा सडकमा तामझाम नगर्ने र लामो स्कर्टलाई रोक लगाइएको छ । मूल्याङ्कन समितिलाई कुनै पनि प्रहरी कार्यालयहरूले भोज खुवाउन पाउने छैनन् । प्रहरी कार्यालयभन्दा बाहिर होटलमा भोज आयोजना गरिए त्यस्ता भोजमा सहभागी नहुने आचार संहिता लागु गरिएको छ ।
प्रहरी प्रधान कार्यालयका एक जना उच्च अधिकृत भन्छन्, ‘प्रहरी कार्यालयभन्दा बाहिर आयोजना गरिएको भोजमा मूल्याङ्कन समितिका सदस्यहरू सहभागी हुँदैनन्, आयोजन गर्ने कार्यालयलाई कारबाही हुन्छ ।’
मूल्याङ्कन समितिले उपत्यका प्रहरी कार्यालय रानीपोखरी, उपत्यका ट्राफिक प्रहरी कार्यालय, जिल्ला प्रहरी परिसर काठमाडौँ र प्रहरी प्रभाग बालकोटको निरीक्षण गरिसकेको छ ।
कोशी प्रदेश प्रहरी कार्यालयको निरीक्षण पनि सकिएको छ । मूल्याङ्कन समितिले प्रहरीको कामबारे ‘पब्लिक अडिट’ र ब्याटनको लागी छनोट भएका प्रहरी कार्यालयहरू निरीक्षण गर्ने परम्परा छ ।
अहिलेको प्रहरी ऐन र नियमावलीअनुसार प्रहरी महानिरीक्षक दिपक थापा यसै महिना अवकाशमा जाँदै छन् ।
थापा ३० वर्षे सेवा अवधि पुरा गरेर भदौ १८ मा अवकाशमा जान लागेका हुन् । आईजीपी थापासँगै फारम भरेर तेस्रो लटमा नियुक्ति पाएका चन्द्र कुवेर खापुङ आईजीपीको एकल प्रतिस्पर्धीको रूपमा देखिएका छन् ।
३२ औँ प्रहरी महानिरीक्षकको एकल दाबेदार खापुङ आईजीपी भएमा छोटो कार्यकालमा अवकाशमा जान्छन् ।
वैशाख १६ मा एआईजीमा बढुवा भएका दानबहादुर कार्की, राजन अधिकारी, डा.मनोज कुमार केसी र सिद्धिविक्रम शाह त्यसपछिका आईजीपीका प्रतिस्पर्धी हुन् । आईजीपीको प्रतिस्पर्धी मध्येका एआईजी केसी २ महिना लामो प्रदेश अनुगमनमा निस्केका छन् ।
Discussion about this post