काठमाडौ असोज २२ गते ।
नेपालले आईसीसी टी ट्वान्टी एसिया इस्ट एसिया प्यासिफिक (ईएपी) छनोटमा आज कुवेतसँग खेल्दैछ । खेल नेपाली समय अनुसार साँझ ८ः ४५ मा ओमान क्रिकेट एकेडेमी १ मा सुरु हुनेछ । समूह बी मा दुबै जितका साथ अघि बढ्न चाहन्छन् । सुपर सिक्सका दुबै प्रमुख टोलीलाई यस खेलको नतिजा निकै महत्वपूर्ण हुनेछ ।
यी दुबै टोली सुपर सिक्समा पुगेको खण्डमा आजको विजेताले सुपरसिक्समा पनि दुई अंक पाउनेछ । छनोटको नियम अनुसार समूहमा आफूले हराएको टोली सुपर सिक्समा पुग्दा सुपर सिक्समा दुई अंक मिल्नेछ । त्यसैले आजको खेल निकै महत्वपूर्ण हुनेछ । नेपालको कप्तानी रोहित पौडेल र कुवेतको मोहम्मद अस्लामले गर्नेछन् ।
नेपालका ओपनर कुशल भुर्तेल, अलराउण्डर दीपेन्द्रसिंह ऐरी र स्पिनर सन्दीप लामिछानेको प्रदर्शन आजको खेलमा महत्वपूर्ण हुनेछ । उता कुवेतमा मित भावसार, यासिन पटेल र रविजा सान्दारुवानको प्रदर्शन निकै महत्वपूर्ण हुनेछ । गत अप्रिलमा चार देश सम्मिलित टी ट्वान्टी आई सिरिजको फाइनलमा कुवेतले नेपाललाई ३ रनले हराएको थियो । श्रीलंकाबाट घरेलु क्रिकेट खेलेका रविाले ३६ बलमा ६३ रनको महत्वपूर्ण योगदान दिएका थिए ।
कुवेतको टोलीमा ब्याटिङमा गहिराई हुँदा सुरुवातमा विकेट लिन आवश्यक देखिन्छ । उक्त खेल हार्दाका ९ खेलाडीले आजपनि नेपालबाट खेल्ने देखिन्छ । बसिर अहमद टोलीमा नहुँदा ललित नारायण राजवंशीको स्थानमा सन्दीप खेल्ने देखिन्छ । यता नेपालको पनि ब्याटिङमा गहिराईछ । राम्रो सुरुवात पाएमा सजिजै बलियो योगफल बनाउन सक्छ । कुवेतका स्पिनर यासिन पटेल मुख्य हतियार हुन् । कुवेतलाई यस प्रतियोगिता अन्डरडग टोलीको रुपमा हेरिएको छ ।
कुवेतले नेपाल, युएई र ओमान मध्य एकलाई पछि पार्दै पहिलो पटक विश्वकप खेल्ने सपना देखेको छ । नेपाल र कुवेतबीच टी ट्वान्टी आईमा तीन खेल भएका छन् । नेपाल २ खेलमा विजयी हुँदा एक खेलमा पराजित भएको छ । गत अप्रिलमा सिरिजकै खेलमा १ सय ८६ रनको लक्ष्य नेपालले ४ विकेट गुमाउँदै ६ बल अगाडि पूरा गरेको थियो । सन् २०१९ मा नेपालले कुवेतलाई ७ विकेटले हराएको थियो ।
खेलअघि नेपालका कप्तान रोहित पौडेलको भनाई, ‘कुवेतले पछिल्लो समय राम्रो क्रिकेट खेलेको छ । तर हामीले राम्रो क्रिकेट खेल्नुपर्छ । हाम्रो क्षमता अनुसार क्रिकेट खेल्ने हो भने यो प्रतियोगितामा हामीलाई कसैले हराउन सक्दैन ।’
Discussion about this post