काठमाडौं कात्तिक १७ गते ।
तेस्रो खेलमा पाँच विकेटको जित निकाल्दै भारतले घरेलु टिम अस्ट्रेलियाविरुद्धको टी–२० शृंखला १–१ को बराबरीमा ल्याएको छ । आइतबार होबर्टमा सम्पन्न तेस्रो खेलमा अस्ट्रेलियाले प्रस्तुत गरेको १८७ रनको लक्ष्य भारतले १८.३ ओभरमा पाँच विकेट गुमाएर पूरा ग¥यो ।
भारतको जितमा वासिङ्टन सुन्दरले सर्वाधिक ४८ रन बनाए । तिलक वर्माले २९, ओपनर अभिषेक शर्माले २५, कप्तान सूर्यकुमार यादवले २४ र जितेश शर्माले २२ रन जोडे । अक्षर पटेलले १७ रन थपे । अस्ट्रेलियाका नाथन एलिसले तीन विकेट लिए । जाभियर बार्टलेट र मार्कुस स्टोइनिसले एक–एक विकेट लिए ।
त्यसअघि, टस हारेर ब्याटिङमा आएको अस्ट्रेलियाले निर्धारित २० ओभरमा ६ विकेट गुमाएर १८६ रनको योगफल खडा गरेको थियो । अस्ट्रेलियाका टिम डेविडले सर्वाधिक ७४ रन बनाए । आक्रामक ब्याटिङ गरेका डेविडले ३८ बलमा आठ चौका र पाँच छक्का प्रहार गरे ।
मार्कुस स्टोइनिसले ३९ बलमा आठ चौका र दुई छक्कासहित ६४ रन थपे । यस्तै, म्याथ्यु सर्टले २६ र कप्तान मिचेल मार्सले ११ रन जोडे । भारतका अर्शदीप सिंहले तीन विकेट लिए । वरुण चक्रवर्तीले दुई र सिवम दुवेले एक विकेट लिए ।
यसअघि, यी दुई टिमबीचको पहिलो खेल रद्द भएको थियो । यस्तै, दोस्रो खेलमा अस्ट्रेलियाले चार विकेटको जित निकालेको थियो । शृंखलाको चौथो खेल नोभेम्बर ६ मा हुनेछ ।
Discussion about this post