बाँके माघ १५ गते ।
आगामी फागुन २१ गते हुने प्रतिनिधिसभा सदस्य निर्वाचनको मनोनयन प्रक्रिया सकिएसँगै बाँके जिल्लामा चुनावी सरगर्मी तीव्र बन्दै गएको छ ।
विभिन्न राजनीतिक दल तथा उम्मेदवारहरूले प्रचार–प्रसार समिति गठन र निर्वाचन सम्पर्क कार्यालय स्थापना गर्न थालेपछि जिल्लाका तीनवटै निर्वाचन क्षेत्र निर्वाचनमय बन्दै गएका छन् ।
मनोनयन दर्ता गराएका अधिकांश दल र उम्मेदवार अहिले चुनावी रणनीति तय गर्न व्यस्त देखिएका छन् । मतदातालाई आकर्षित गर्न चुनावी समीकरण, घरदैलो अभियान र जनसम्पर्कलाई प्राथमिकतामा राखिएको छ ।
जनता समाजवादी पार्टी नेपालका केन्द्रीय सचिव तथा बाँके क्षेत्र नम्बर–२ का उम्मेदवार कमरुद्दीन राईले जिल्लाका तीनवटै निर्वाचन क्षेत्रमा प्रचार–प्रसार समिति गठन र सम्पर्क कार्यालय स्थापना गर्ने कार्य सुरु भइसकेको जानकारी दिए ।
यस्तै, नेपाली कांग्रेस बाँकेका सभापति तथा क्षेत्र नम्बर–१ का उम्मेदवार नारायण गौडेलले कांग्रेसले पनि क्षेत्रीय प्रचार–प्रसार समिति गठन र निर्वाचन सम्पर्क कार्यालय स्थापना गर्ने काम अघि बढाइसकेको बताए । औपचारिक तथा अनौपचारिक प्रचार सुरु भएसँगै समग्र जिल्ला निर्वाचनमय बन्दै गएको उनको भनाइ छ ।
नेकपा (कम्युनिस्ट पार्टी) का केन्द्रीय सदस्य तथा बाँके क्षेत्र नम्बर–२ का उम्मेदवार दीपेन्द्र विष्टले प्रतिबद्धता पत्र सार्वजनिक गर्दै घरदैलो र जनसम्पर्क अभियान अघि बढाइसकेको बताए । साथै विभिन्न स्थानमा सम्पर्क कार्यालय स्थापना गर्ने कार्यसमेत सँगसँगै भइरहेको उनले जनाए ।
राष्ट्रिय स्वतन्त्र पार्टीका नेता निलराज अधिकारीले पार्टीले कार्यकर्ता परिचालन गरी जनताको धारणा बुझ्ने कार्य सुरु गर्दै प्रचार–प्रसारलाई तीव्रता दिएको बताए ।
राष्ट्रिय जनमत पार्टीका संस्थापक तथा बाँके क्षेत्र नम्बर–२ का उम्मेदवार इरफान अहमद शेषले पनि जिल्लाका तीनवटै निर्वाचन क्षेत्रमा प्रचार–प्रसार समिति गठन र सम्पर्क कार्यालय स्थापना सुरु भइसकेको जानकारी दिए ।
यसैबीच, पूर्वमन्त्री मोहम्मद इस्तियाक राई नेकपा (एमाले) का उम्मेदवार बनेसँगै बाँके क्षेत्र नम्बर–२ सर्वाधिक चर्चामा आएको नेकपा (एमाले) बाँकेका अध्यक्ष निरक गुरुङले बताए । उनले क्षेत्रीय प्रचार–प्रसार समिति गठन र सम्पर्क कार्यालय स्थापना गर्ने कार्य सुरु गरिएको बताए ।
राष्ट्रिय प्रजातन्त्र पार्टीका केन्द्रीय सहमहामन्त्री तथा बाँके क्षेत्र नम्बर–२ का उम्मेदवार ऋषिराज देवकोटाले पनि प्रचार–प्रसार समिति गठन र सम्पर्क कार्यालय स्थापना गर्ने कार्यमा पार्टी सक्रिय रहेको बताए ।
यसैगरी स्वतन्त्र उम्मेदवारहरूले पनि घरदैलो र जनसम्पर्क अभियान सुरु गरिसकेको जनाएका छन् । स्वतन्त्र उम्मेदवार गोपाल प्रसाद गिरीले जनताका एजेन्डा र माग बुझ्न जनसम्पर्क अभियानलाई प्राथमिकता दिएको बताए ।
मुख्य निर्वाचन अधिकृतको कार्यालय बाँकेका अनुसार जिल्लाका तीनवटै निर्वाचन क्षेत्रमा तीन सिटका लागि ५६ जना उम्मेदवारबीच प्रतिस्पर्धा भइरहेको छ ।
Discussion about this post