बाँके फागुन १४ गते ।
बाँके जिल्लामा पाठेघरको मुखको क्यान्सरविरुद्धको ह्युमन प्यापिलोमा भाइरस (एचपिभी) खोप अभियानअन्तर्गत सात हजार ८९७ जना किशोरीलाई खोप लगाइएको छ। जिल्ला स्वास्थ्य कार्यालय, बाँकेका अनुसार यस वर्ष आठ हजार ५८४ जनालाई खोप लगाउने लक्ष्य राखिएकोमा ९२ प्रतिशत उपलब्धि हासिल भएको हो।
जिल्ला स्वास्थ्य कार्यालय, बाँकेका जनस्वास्थ्य अधिकृत गोकर्ण गिरीका अनुसार केही अपवादबाहेक लक्षित समूहमा पर्ने अधिकांश किशोरीलाई खोप लगाइएको छ। “केही अपवादका रूपमा छुट्नुभएको हुनसक्छ, तर समग्रमा एचपिभी खोप अभियान सफलतापूर्वक सम्पन्न गरेका छौँ,” उनले बताए।
पालिकागत विवरणअनुसार कोहलपुर नगरपालिकामा एक हजार ७००, खजुरा गाउँपालिकामा एक हजार, जानकी गाउँपालिकामा ६७०, नरैनापुर गाउँपालिकामा ७३१, बैजनाथ गाउँपालिकामा ८८१, राप्तीसोनारी गाउँपालिकामा ५८०, नेपालगञ्ज उपमहानगरपालिकामा एक हजार ९०९ र डुडुवा गाउँपालिकामा ४२६ जनालाई खोप लगाइएको छ। सबैभन्दा बढी नेपालगञ्ज उपमहानगरपालिकामा र सबैभन्दा कम डुडुवा गाउँपालिकामा खोप लगाइएको जनाइएको छ।
जिल्ला स्वास्थ्य कार्यालयका अनुसार विद्यालय जाने छ हजार ५३१ र विद्यालय नजाने दुई हजार ५३ गरी कूल आठ हजार ५८४ जना किशोरीलाई खोप लगाउने लक्ष्य निर्धारण गरिएको थियो। कक्षा ६ मा अध्ययनरत छात्रा, विद्यालय नजाने १० वर्ष उमेरका किशोरी, गत वर्षको अभियानमा छुटेका हाल कक्षा ७ देखि १० सम्म अध्ययनरत छात्रा तथा ११ देखि १४ वर्ष उमेर समूहका किशोरीलाई लक्षित समूहमा राखिएको थियो।
जनस्वास्थ्य अधिकृत गिरीका अनुसार एचपिभी खोपले भाइरसका १६ र १८ प्रजातिबाट हुने पाठेघरको मुखको क्यान्सरबाट जोगाउन सहयोग गर्छ। उनले उक्त खोप सुरक्षित र प्रभावकारी रहेको उल्लेख गरे। नेपालमा औसतमा दैनिक चार जना महिलाको पाठेघरको मुखको क्यान्सरका कारण मृत्यु हुने तथ्याङ्क रहेको पनि उनले जानकारी दिए।
गत माघ २५ गतेदेखि फागुन ११ गतेसम्म सञ्चालन गरिएको उक्त अभियानअन्तर्गत खोप कार्यक्रम सम्पन्न भएको हो। गत वर्ष बाँकेमा ३३ हजार ७५९ जनालाई एचपिभी खोप लगाइएको थियो।
Discussion about this post