बाँके फागुन १४ गते ।
प्रतिनिधिसभा सदस्य निर्वाचनलाई लक्षित गर्दै बाँकेमा तयारी तीव्र पारिएको छ। मुख्य निर्वाचन अधिकृतको कार्यालय, नेपालगञ्जले निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न आवश्यक व्यवस्थापनलाई अन्तिम चरणमा पु¥याएको जनाएको छ।
सहायक निर्वाचन अधिकृत लालबहादुर कार्कीका अनुसार प्रारम्भिक चरणमै निर्वाचन आयोगको निर्देशिका र तालिमअनुसार उम्मेदवारहरूले उम्मेदवारी दर्ता गरी प्रचारप्रसार अघि बढाइसकेका छन्। अब प्रशासनिक तथा प्राविधिक तयारीलाई थप सुदृढ बनाउने काम भइरहेको उनले जानकारी दिए।
जिल्लाका तीनवटै निर्वाचन क्षेत्रमा गरी कुल २ हजार ४ सय ९ जना कर्मचारी परिचालन गर्ने तयारी गरिएको छ। निर्वाचन क्षेत्र नं. १ अन्तर्गत १४१ मतदान केन्द्रका लागि ८४६ जना कर्मचारी खटाइनेछन्। क्षेत्र नं. २ मा १२४ मतदान केन्द्र र २ अस्थायी मतदान केन्द्रका लागि ७४४ जना कर्मचारी परिचालन गरिनेछ। त्यस्तै, क्षेत्र नं. ३ मा १३५ मतदान केन्द्र र १ अस्थायी मतदान केन्द्रका लागि आवश्यक कर्मचारीका साथै थप ९ जना स्वयंसेवक खटाइने सहायक निर्वाचन अधिकृत कार्कीले बताए।
निर्वाचन सामग्री व्यवस्थापनको काम पनि सँगसँगै अघि बढिरहेको छ। मतपत्र आउने क्रम सुरु भइसकेको छ भने छिट्टै प्याकिङ कार्य थालिने जनाइएको छ। मतदान अधिकृत तथा सहायक मतदान अधिकृतहरूलाई नमुना मतदानसम्बन्धी तालिम दिन थालिएको छ। “नमुना अभ्यासले कर्मचारीलाई मतदान प्रक्रियामा आत्मविश्वास र सहजता प्रदान गर्छ,” कार्कीले भने।
निर्वाचनलाई मर्यादित र पारदर्शी बनाउन आचारसंहिताको प्रभावकारी अनुगमन भइरहेको पनि कार्यालयले जनाएको छ। निर्वाचन प्रक्रिया चुनौतीपूर्ण भए पनि बाँकेमा शान्तिपूर्ण र व्यवस्थित रूपमा मतदान सम्पन्न हुनेमा कार्यालय विश्वस्त रहेको छ।
सहायक निर्वाचन अधिकृत कार्कीले लोकतन्त्रको महत्त्वपूर्ण पर्वमा सक्रिय सहभागिता जनाउन सबै मतदातालाई अपिल गर्दै भने, “फागुन २१ गतेको मतदान केवल अधिकार मात्र होइन, जिम्मेवारी पनि हो। आउनुहोस्, उत्साहपूर्वक मतदानमा सहभागी भई लोकतन्त्रलाई अझ बलियो बनाऔँ।”
Discussion about this post