बाँके फागुन १४ गते ।
जनता समाजवादी पार्टी, नेपाल (जसपा) का तर्फबाट बाँके निर्वाचन क्षेत्र नं. २ का प्रतिनिधि सभा सदस्य पदका उम्मेदवार कमरुद्दिन राईलाई नेपालगन्ज उपमहानगरपालिका–१५ जमुनाह गाउँका स्थानीयवासीले भव्य स्वागत गरेका छन् । चुनावी घरदैलो कार्यक्रमका क्रममा जमुनाह पुगेका राईलाई स्थानीय मतदाताले फूलमाला, अबिर तथा उत्साहपूर्ण नारासहित स्वागत गरेका हुन्।
घरदैलो अभियानका क्रममा राईले टोल–टोलमा पुगेर स्थानीयवासीसँग प्रत्यक्ष संवाद गरेका थिए। उनले विगतका अधुरा योजना पूरा गर्ने, आधारभूत पूर्वाधार विकासलाई प्राथमिकता दिने तथा युवालाई रोजगारीसँग जोड्ने प्रतिबद्धता व्यक्त गरे। शिक्षा, स्वास्थ्य, कृषि तथा साना उद्यम प्रवद्र्धनमार्फत क्षेत्रको समग्र विकास सम्भव हुने उल्लेख गर्दै उनले त्यसका लागि ठोस कार्ययोजना बनाएर अघि बढ्ने बताए।
राईले निर्वाचनपछि पनि जनतासँग निरन्तर सम्पर्कमा रहने र समस्याको समाधानका लागि सक्रिय पहल गर्ने आश्वासन दिए। “निर्वाचन जितेपछि जनतासँगको सम्बन्ध टुट्ने होइन, अझ सुदृढ बनाउनेछु,” उनले भने, “जनताको विश्वास र साथ नै मेरो सबैभन्दा ठूलो शक्ति हो।”
स्थानीय बासिन्दाले राईप्रति सकारात्मक प्रतिक्रिया जनाउँदै विगतमा उठाइएका विकासका मुद्दा अझै सम्बोधन हुन नसकेको बताएका छन्। उनीहरूले यसपटक जनप्रतिनिधिले व्यवहारमै परिणाम देखाउनुपर्नेमा जोड दिएका छन्। केही ज्येष्ठ नागरिकले सडक स्तरोन्नति, सिँचाइ सुविधा विस्तार तथा स्वास्थ्य सेवामा सहज पहुँच सुनिश्चित गर्न आग्रह गरेका थिए।
युवाहरूले खेलमैदान निर्माण, प्राविधिक शिक्षालय स्थापना तथा रोजगारीका अवसर सिर्जनालाई प्राथमिकतामा राख्न माग गरेका छन्।
जमुनाह–पिप्रहवा क्षेत्रमा चुनावी गतिविधि क्रमशः तीव्र बन्दै गएको छ। विभिन्न राजनीतिक दलका उम्मेदवारहरू घरदैलो र कोणसभा मार्फत मतदाता समक्ष पुगिरहेका छन्। जमुनाहमा देखिएको जनसहभागिता र स्वागतले निर्वाचन प्रतिस्पर्धा थप सक्रिय र रोचक बन्दै गएको संकेत गरेको छ।
आगामी निर्वाचन नजिकिँदै जाँदा स्थानीय तहमा राजनीतिक चहलपहल बढेको छ भने मतदाताहरू पनि यसपटक विकास र कार्यसम्पादनलाई मुख्य आधार बनाएर निर्णय गर्ने तयारीमा देखिएका छन्।
Discussion about this post