बाँके वैशाख १५ गते।
भेरी अस्पतालका प्रमुख मेडिकल सुपरिन्टेन्डेन्ट डा. निराजन सुवेदीसहितका चिकित्सकमाथि हातपातको प्रयास, दुव्र्यवहार तथा ज्यान मार्ने धम्की दिइएको घटनापछि दोषीमाथि कारबाही र सुरक्षाको माग गर्दै चिकित्सकहरू आन्दोलनमा उत्रिएका छन्।
अस्पतालका अनुसार बैजनाथ गाउँपालिका–६, बाँकेकी ६२ वर्षीया दिलसरा विकको मृत्युको विषयलाई लिएर आज बिहान करिब साढे १० बजे एक समूह डा. सुवेदीको कार्यकक्षमा प्रवेश गरी हातपातको प्रयास गरेको तथा अपमानजनक व्यवहार गरेको प्रत्यक्षदर्शी चिकित्सकहरूले बताएका छन्। सोही क्रममा प्रमुख कन्सल्टेन्ट फिजिसियन डा. राजन पाण्डेलगायतका चिकित्सकलाई ज्यान मार्ने धम्कीसमेत दिइएको अस्पताल प्रशासनले जनाएको छ।
दोषीमाथि कारबाही र सम्पूर्ण स्वास्थ्यकर्मीको सुरक्षाको पूर्ण प्रत्याभूति नभएसम्म सेवामा फर्किन नसकिने डा. सुवेदीले बताए। “उपचारका क्रममा बिरामीको मृत्यु हुँदा हामीलाई पनि दुःख लागेको छ। तर असहमति भए कानुनी प्रक्रिया अपनाउने विकल्प हुँदाहुँदै चिकित्सकमाथि आक्रमणको प्रयास र धम्की दिनु स्वीकार्य छैन,” उनले भने।
घटनापछि चिकित्सकहरू त्रासमा रहेको बताउँदै डा. पाण्डेले पनि यस्ता गतिविधि निन्दनीय भएको उल्लेख गरे। उनले उपचार प्रक्रियामा असन्तुष्टि भए कानुनी बाटो खुला रहेको र चिकित्सक दोषी ठहरिए कानुनअनुसार कारबाही भोग्न तयार रहने स्पष्ट पारे।
यसैबीच, प्रतिनिधिसभा सदस्य खगेन्द्र सुनारको सहजीकरणमा सोमबार चिकित्सक र मृतकका आफन्तबीच भएको छलफलमा उपचारमा संलग्न चिकित्सकमाथि कानुनी प्रक्रिया अघि बढाउने तथा मंगलबार शव पोष्टमार्टम गरी आफन्तलाई बुझ्ने सहमति भएको थियो। सोहीअनुसार पीडित पक्षले प्रहरीमा जाहेरीसमेत दर्ता गराइसकेको छ।
तर सहमति भइसकेपछि पनि आज बिहान मृतकका छोरा सुरेश विकलगायतको समूहले चिकित्सकमाथि दुव्र्यवहार गरेको डा. सुवेदीको भनाइ छ। यद्यपि सुरेश विकले भने आफूले हातपात नगरेको दाबी गरेका छन् र शव बुझेर लगिसकेको बताएका छन्।
गत वैशाख ६ गते उपचारका लागि भर्ना भएकी दिलसरा विकको वैशाख १३ गते मृत्यु भएको थियो। घटनापछि अस्पतालमा इमरजेन्सीबाहेकका सबै सेवा बन्द गरिएको छ।
Discussion about this post