बाँके, असार २९ गते ।
बाँकेको कोहलपुर नगरपालिका–९ स्थित श्री उषा हरियाली सामुदायिक वन क्षेत्रमा एकै दिन दुई हजार ४०० बिरुवा रोपिएको छ।
स्ट्यान्डर्ड चार्टर्ड बैंकको आर्थिक सहयोग, क्लिन अप नेपालको समन्वय तथा आठ बिलियन ट्रिज नेपालको व्यवस्थापनमा शनिबार सञ्चालन गरिएको वृक्षारोपण अभियानअन्तर्गत महुवा, अर्जुन, हर्रो, सतिसाल, अमला, शीतलचिनी, जामुन र खयरलगायत विभिन्न प्रजातिका बिरुवा रोपिएको आठ बिलियन ट्रिज नेपालका निर्देशक हेमन्तराज काफ्लेले जानकारी दिए।
अभियानको शुभारम्भ लुम्बिनी प्रदेशका आन्तरिक मामिला तथा कानुनमन्त्री भण्डारीलाल यादवले गरेका थिए। सो अवसरमा पूर्व अर्थसचिव डा. कृष्णहरि बाँस्कोटा र प्रदेशसभा सदस्य अम्बिका काफ्लेले पनि वृक्षारोपणमा सहभागिता जनाए।
कार्यक्रमलाई सम्बोधन गर्दै मन्त्री यादवले वातावरण संरक्षण, हरियाली विस्तार र वनको दिगो व्यवस्थापनका लागि वृक्षारोपण प्रभावकारी माध्यम भएको बताए। उनले बिरुवा रोप्नेभन्दा त्यसको संरक्षण र नियमित हेरचाह अझ महत्वपूर्ण हुने उल्लेख गर्दै रोपिएका बिरुवाको दीर्घकालीन संरक्षणमा सबै पक्ष गम्भीर हुनुपर्ने बताए।
पूर्व अर्थसचिव डा. बाँस्कोटाले वन संरक्षण, वातावरणीय सन्तुलन तथा कार्बन प्राइसिङको अवधारणाले वनको आर्थिक र वातावरणीय महत्त्व थप बढाएको बताए।
प्रदेशसभा सदस्य अम्बिका काफ्लेले जैविक विविधता संरक्षण र भावी पुस्ताका लागि वृक्षारोपण अपरिहार्य रहेको उल्लेख गर्दै बिरुवा रोप्नेसँगै त्यसको संरक्षणमा विशेष ध्यान दिनुपर्ने धारणा राखिन्।
कार्यक्रममा वास नेपालका कार्यकारी निर्देशक नमस्कार शाह, क्लिन अप नेपालका कार्यकारी निर्देशक रबिन्द्र लामिछाने, परियोजना संयोजक प्रेमप्रकाश नेपाली, कोहलपुर–९ का वडाध्यक्ष उपेन्द्रनाथ योगीलगायत जनप्रतिनिधि, सामाजिक अभियन्ता, डिभिजन वन कार्यालयका कर्मचारी, सामुदायिक वनका उपभोक्ता तथा स्थानीयवासीको सहभागिता रहेको थियो।
Discussion about this post