बाँके, साउन १३ गते ।
लुम्बिनी प्रदेश सरकारबाट नेपाली कांग्रेसका पाँच मन्त्रीले एकैसाथ राजीनामा दिएपछि मुख्यमन्त्री चेतनारायण आचार्यले पाँच मन्त्रालयको जिम्मेवारी आफैंले सम्हालेका छन्। सत्ता समीकरण परिवर्तनसँगै प्रदेश सरकारको कार्यविभाजन पनि फेरबदल गरिएको हो।
मुख्यमन्त्री आचार्यले प्रदेश सरकार कार्यविभाजन नियमावली, २०७९ को नियम ४ को उपनियम (२) अनुसार मन्त्रिपरिषद्को कार्यविभाजन हेरफेर गर्दै मुख्यमन्त्री तथा मन्त्रिपरिषद्को कार्यालयसँगै आर्थिक मामिला तथा योजना, सहरी विकास तथा खानेपानी, उद्योग, पर्यटन तथा यातायात, वन तथा वातावरण तथा सामाजिक विकास मन्त्रालयको कार्यभार आफैंले लिएका हुन्।
मंगलबार कांग्रेसका तर्फबाट सरकारमा सहभागी सहरी विकास तथा खानेपानी मन्त्री सरोज थापा, आर्थिक मामिला तथा योजना मन्त्री धनेन्द्र कार्की, उद्योग, पर्यटन तथा यातायात मन्त्री प्रचण्डविक्रम न्यौपाने, सामाजिक विकास मन्त्री जन्मजय तिमिल्सिना तथा वन तथा वातावरण मन्त्री देवकरणप्रसाद कलवारले मन्त्री पदबाट सामूहिक राजीनामा दिएका थिए।
कांग्रेसका मन्त्रीहरूको राजीनामासँगै लुम्बिनी प्रदेशको सत्ता समीकरण बदलिएको छ। अब प्रदेशमा नेकपा (एमाले) र नेपाल कम्युनिस्ट पार्टी (नेकपा) को संयुक्त सरकार गठन हुने तयारी भएको छ।
मुख्यमन्त्री कार्यालयले नयाँ सरकार गठन नभएसम्म प्रशासनिक निरन्तरताका लागि मन्त्रालयहरूको जिम्मेवारी मुख्यमन्त्रीलाई तोकिएको जनाएको छ।
Discussion about this post