चितवन, साउन २६ गते ।
पश्चिम चितवनको मेघौलीस्थित हरियाली सामुदायिक वनमा बाघको आक्रमणबाट एक पुरुषको मृत्यु भएको आशंका गरिएको छ। शव भेटिएको स्थाननजिकै बाघ देखिएपछि हात्ती परिचालन गरेर शव निकाल्ने प्रयास भइरहेको छ।
चितवन राष्ट्रिय निकुञ्जका सूचना अधिकारी अविनाश मगरका अनुसार सामुदायिक वनमा एक पुरुषको शव रहेको सूचना आएपछि निकुञ्जको टोली घटनास्थल पुगेको हो। शव नजिकै बाघ रहेकाले हात्ती प्रयोग गरी बाघलाई सुरक्षित दूरीतर्फ धपाउने प्रयास भइरहेको उनले बताए।
मृतकको पहिचान भने खुल्न सकेको छैन। स्थानीयका अनुसार भरतपुर महानगरपालिका–२८, जितपुरका ६१ वर्षीय मगले बोटे सम्पर्कविहीन छन्। उनी हरियाली सामुदायिक वनमा घाँस काट्न गएको बताइएको छ।
घाँस काट्न जंगल गएका बोटेलाई बाघले आक्रमण गरेको हुन सक्ने प्रारम्भिक अनुमान गरिएको छ। घटनास्थलमा खोजी तथा उद्धारका लागि हात्तीसहितको प्राविधिक टोली परिचालन गरिएको छ।
बाघको सम्भावित जोखिमलाई ध्यानमा राख्दै घटनास्थलमा सर्वसाधारणको आवतजावत रोकिएको छ। प्राविधिक टोलीले घटनास्थलको निरीक्षणसँगै शव निकाल्ने तथा मृतकको पहिचान र सनाखत गर्ने प्रक्रिया अघि बढाएको निकुञ्जले जनाएको छ।
मृत्युको वास्तविक कारण भने शव परीक्षण तथा घटनास्थलको प्रारम्भिक अनुसन्धानपछि मात्रै यकिन हुने जनाइएको छ।
Discussion about this post