बाँके, साउन २७ गते ।
नेपालगन्जस्थित भेरी अस्पतालले जनावरको टोकाइ, सर्पदंश तथा विषालु जीवजन्तुसँग सम्बन्धित घटनाको व्यवस्थित अभिलेख राख्दै अध्ययन–अनुसन्धान सुरु गरेको छ । अस्पतालले यस्ता बिरामीको उपचारसँगै तथ्यांक संकलन र विश्लेषण गर्न ‘बाइट रजिस्टरी’ सञ्चालनमा ल्याएको हो ।
अस्पतालका प्रमुख मेडिकल सुपरिटेन्डेन्ट डा. नवीन दर्नालका अनुसार प्रमाणमा आधारित चिकित्सा प्रणालीको विकास गर्ने उद्देश्यले विद्युतीय स्वास्थ्य अभिलेखमा आधारित अनुसन्धान प्लेटफर्मअन्तर्गत पहिलो संस्थागत परियोजनाका रूपमा रजिस्टरी सुरु गरिएको हो ।
साउन १६ गतेदेखि सुरु गरिएको अध्ययन प्रारम्भिक रूपमा एक वर्ष सञ्चालन हुनेछ । यस क्रममा कुकुरलगायत जनावरको टोकाइ, सर्पदंश, किराफट्यांग्राको टोकाइ तथा अन्य विषालु वा हानिकारक जीवजन्तुसँग सम्बन्धित घटनाको एकीकृत अभिलेख राखिनेछ ।
अध्ययनमा रेबिजविरुद्धको खोप, रेबिज इम्युनोग्लोबुलिन र एन्टिस्नेक भेनमको उपलब्धता, प्रयोग तथा प्रभावकारितासमेत विश्लेषण गरिने डा. दर्नालले बताए । यस्ता उपचार सामग्रीको प्रयोगले बिरामीको उपचार र समग्र जनस्वास्थ्यमा पार्ने प्रभावसमेत अध्ययन गरिने अस्पतालले जनाएको छ ।
अनुसन्धान अस्पतालका प्रमुख कन्सल्टेन्ट डर्मेटोलोजिस्ट डा. बद्री चापागाईंको नेतृत्वमा भइरहेको छ । टोलीमा मेडिसिन विभाग प्रमुख डा. राजन पाण्डे, एनेस्थेसियोलोजी विभाग प्रमुख डा. पारश पाण्डे, कन्सल्टेन्ट फरेन्सिक मेडिसिन विशेषज्ञ डा. अर्बिन शाक्य, कन्सल्टेन्ट फिजिसियन डा. संकेत रिसाल, कन्सल्टेन्ट नेफ्रोलोजिस्ट डा. सौरभ हमाल र कन्सल्टेन्ट बालरोग विशेषज्ञ डा. प्रतिभा खड्कासहितका स्वास्थ्यकर्मी छन् ।
रजिस्टरीमा राष्ट्रिय निकुञ्ज, मध्यवर्ती क्षेत्र र मानव बस्तीबीचको अन्तरक्रियाबाट हुने जंगली जनावरसँग सम्बन्धित घटनालाई समेत समेटिने अस्पतालले जनाएको छ । अनुसन्धानका लागि आवश्यक तथ्यांक अस्पतालको विद्युतीय स्वास्थ्य अभिलेख प्रणालीसँग अन्तरआबद्ध गरिएको छ ।
अस्पतालका अनुसार बिरामीको नियमित उपचारकै क्रममा आवश्यक विवरण अभिलेख हुने भएकाले तथ्यांक संकलनका लागि बिरामी वा स्वास्थ्यकर्मीलाई छुट्टै अतिरिक्त भार पर्ने छैन । संकलित तथ्यांकबाट उपचार सेवाको गुणस्तर सुधार, उपचार निर्देशिका परिमार्जन तथा भावी स्वास्थ्य नीति निर्माणमा सहयोग पुग्ने अपेक्षा गरिएको छ ।
भेरी अस्पताल विकास समितिका कार्यवाहक अध्यक्ष डा. डक्टप्रसाद धितालले आवश्यकता हेरी अध्ययनको अवधि विस्तार गर्दै भविष्यमा यसलाई राष्ट्रियस्तरको रजिस्टरीका रूपमा विकास गर्ने लक्ष्य रहेको बताए ।
उनका अनुसार पश्चिम नेपालका तीनवटा प्रदेशबाट कुकुर, सर्प तथा अन्य जनावर र जीवजन्तुको टोकाइबाट प्रभावित बिरामी उपचारका लागि भेरी अस्पताल आउने गरेका छन् । त्यसैले अस्पतालमा संकलन हुने तथ्यांकले पश्चिम नेपालमा यस्ता घटनाको वास्तविक अवस्था पहिचान गर्नसमेत सहयोग पुग्ने अपेक्षा गरिएको छ ।
Discussion about this post