बाँके, साउन ३० गते ।
राप्ती सोनारी गाउँपालिका–९ ढकेरीस्थित भक्ताखोलामा तटबन्ध निर्माण गरी बहाव सुरक्षित निकासतर्फ मोडिएपछि वर्षौंदेखि बाढी र डुबानको समस्या झेल्दै आएका स्थानीयलाई राहत भएको छ।
वर्षायाममा भक्ताखोलाको बाढी बस्तीमा पस्दा ढकेरी, गुरुवागाउँलगायतका क्षेत्रमा डुबान र कटान हुने गरेको थियो। बस्तीमा बाढी पस्न नदिन जङ्गल क्षेत्रबाटै तटबन्ध निर्माण गरी खोलाको बहाव मोडिएको वडाध्यक्ष सोहनलाल थारुले बताए।
लुम्बिनी प्रदेश सरकारको ५५ लाख रुपैयाँ लागतमा गुरुवागाउँ नजिकै आँपखोली सामुदायिक वन क्षेत्रको चुरे पहाड काटेर भक्ताखोलालाई वन क्षेत्र हुँदै वसन्ता खोलामा मिसाइएको हो। यससँगै भक्ताखोला र चुके नालाबाट आउने बाढी बस्तीभन्दा बाहिरै वसन्ता खोलातर्फ निकास हुने व्यवस्था गरिएको छ।
तटबन्ध र नयाँ निकासका कारण राप्ती सोनारी–९ का गुरुवागाउँ, खड्काटोल, पहाडीपूर्वा, थारुगाउँ, ढकेरी र पम्पबजारलगायतका बस्ती बाढी तथा कटानको जोखिमबाट जोगिने अपेक्षा गरिएको छ।
गाउँपालिका अध्यक्ष तप्त पौडेलले भक्ताखोलाको समस्या समाधानका लागि गरिएको यो काम विपद् व्यवस्थापनको सकारात्मक अभ्यास भएको बताए। उनका अनुसार गाउँपालिकामा भक्ताखोलाजस्तै अन्य खहरेखोलाबाट पनि बस्ती जोखिममा छन्। “यस्ता खोलाको दीर्घकालीन व्यवस्थापनका लागि पनि पहल सुरु गरेका छौँ,” उनले भने।
ढकेरी बजार व्यवस्थापन समितिका अध्यक्ष विश्वराज खनालले वर्षौंदेखि स्थानीयलाई दुःख दिँदै आएको भक्ताखोलाको बहाव मोडिएपछि यस वर्षदेखि बाढीको समस्या कम हुने अपेक्षा गरिएको बताए। “असार–साउन लागेपछि बाढीका कारण स्थानीयमा त्रास हुन्थ्यो। तटबन्ध र नयाँ निकासले दशकौँदेखिको समस्या समाधान हुने आशा पलाएको छ,” उनले भने।
Discussion about this post