बाँके, साउन ३० गते ।
नेपालगन्ज उद्योग वाणिज्य संघको आगामी निर्वाचनमा महिला उपाध्यक्ष पदका लागि व्यवसायी रूपा ओझा (सानु) ले उम्मेदवारी दिएकी छन्। उनी चिरञ्जीवी ओली नेतृत्वको समूहबाट चुनावी मैदानमा उत्रिएकी हुन्।
व्यवसायीको हकहित संरक्षण, व्यवसाय प्रवद्र्धन र व्यावसायिक वातावरण सुधारलाई प्राथमिकतामा राखेर उम्मेदवारी दिएको ओझाले बताएकी छन्। व्यवसायीका समस्या र सरोकारलाई संघमार्फत प्रभावकारी रूपमा उठाउँदै समाधानका लागि सम्बन्धित निकायसँग समन्वय गर्ने उनको प्रतिबद्धता छ।
ओझाले व्यवसायीबीच एकता कायम गर्दै संघलाई सदस्यको हितमा केन्द्रित, पारदर्शी र उत्तरदायी संस्थाका रूपमा अघि बढाउन पहल गर्ने बताएकी छन्। उनका अनुसार संघले व्यवसायीका दैनिक समस्या मात्र नभई दीर्घकालीन व्यावसायिक विकासका विषयमा समेत प्रभावकारी भूमिका खेल्न आवश्यक छ।
ओझा आबद्ध समूहले व्यापारी एकता, व्यवसाय प्रवद्र्धन, पारदर्शिता तथा सुशासन र सदस्यको हितलाई मुख्य एजेन्डा बनाएको छ। साथै महिला उद्यमीको क्षमता विकास र व्यावसायिक क्षेत्रमा उनीहरूको सहभागिता बढाउने विषयलाई पनि प्राथमिकतामा राखिएको समूहले जनाएको छ।
महिला व्यवसायीलाई नेतृत्वमा थप अवसर र उद्यमशीलताका लागि आवश्यक वातावरण निर्माण गर्ने विषय समूहको प्रतिबद्धतामा समेटिएको छ।
‘उत्साही, प्रतिबद्ध र समर्पित नेतृत्व’लाई आधार बनाएको समूहले व्यवसायीका साझा समस्या र मागलाई प्राथमिकताका साथ सम्बोधन गर्ने जनाएको छ।
ओझाले निर्वाचित भए व्यवसायीका सुझाव र गुनासोलाई संस्थागत रूपमा सम्बोधन गर्ने तथा व्यवसायी र सम्बन्धित सरकारी निकायबीच समन्वयको भूमिका प्रभावकारी बनाउने बताएकी छन्।
नेपालगन्ज उद्योग वाणिज्य संघको निर्वाचन नजिकिँदै जाँदा उम्मेदवार तथा समूहहरूले आफ्ना एजेन्डा सार्वजनिक गर्न थालेका छन्। यससँगै संघको निर्वाचनलाई लिएर व्यवसायीबीचको राजनीतिक तथा व्यावसायिक सक्रियता पनि बढ्दै गएको छ।
Discussion about this post