सुर्खेत माघ ९ गते । राष्ट्रिय सभाका १८ सिटका लागि आज मतदान शुरू भएको छ। आज बिहान १० देखि दिउसो ४ बजेसम्म जारी रहने मतदानमा अहिले मतदान गर्ने क्रम जारी छ।
आयोगले प्रदेश–१ का लगि मोरङको विराटगर, प्रदेश–२ का लागि धनुषाको जनकपुर, बागमती प्रदेशका लागि ललितपुरको ललितपुर र गण्डकी प्रदेशका लागि पोखरामा निर्वाचन केन्द्र तोकेको छ।
यस्तै, प्रदेश–५ का लागि दाङको घोराही, कर्णाली प्रदेशका लागि वीरेन्द्रनगर सुर्खेत र सुदूरपश्चिम प्रदेशका लागि डोटीको सिलगढीमा मतदान केन्द्र राखिएको छ। सुर्खेतमा भएको निर्वाचनमा गोपाल शर्माले पहिलो मतदान गरेका छन् ।
निर्वाचनमा पाँच सय ५० प्रदेशसभा सदस्य तथा स्थानीय तहका अध्यक्षरउपाध्यक्ष, प्रमुखरउपप्रमुख एक हजार पाँच सय ६ समेत गरी दुई हजार ५६ मतदाता रहेका छन्। निर्वाचनमा ६ राजनीतिक दलका ४५ उम्मेदवार प्रतिस्पर्धामा छन्।
प्रदेशसभा सदस्यको मतभार ४८ तथा स्थानीय तहका गाउँपालिका अध्यक्ष, उपाध्यक्ष एवं नगरपालिकाका प्रमुख र उपप्रमुखको मतभार १८ कायम गरिएको छ।
मतदानपछि आवश्यक व्यवस्था मिलाई मतगणना गर्न र नतिजा सार्वजनिक गर्न पनि निर्वाचन अधिकृतलाई आयोगले निर्देशन दिइसकेको छ।
५९ सदस्यीय राष्ट्रियसभाका आगामी फागुन २० गते पदावधि सकिने १९ मध्ये १८ नयाँ सदस्य चयनका लागि निर्वाचन भइरहेको हो। एक सदस्य भने सरकारको सिफारिशमा राष्ट्रपतिले मनोनयन गर्ने संवैधानिक प्रावधान छ।
Discussion about this post