बर्दिया चैत्र २६ गते । बर्दियाको ठाकुरबाबा नगरपालिकाले स्थापना गरेको विपत व्यवस्थापन कोषमा सहयोग रकम जम्मा हुने क्रम बढेको छ ।बुधबार ठाकुरबाबा नगरपालिका २ सत्घरुवाका समाजसेवी विनय रावलले विपत कोषमा १ लाख १ हजार रुपैँया सहयोग प्रदान गरेका छन् ।
विपत कोषमा जम्मा हुनेगरि ठाकुरबाबा नगरपालिकाका नगरप्रमुख घननायण श्रेष्ठलाई १ लाख १ हजार रुपैँया हस्तान्तरण गरिएको रावलका सहयोगी रमेश रावलले जानकारी दिए । यसैगरि रावलले सत्घरुवा गाउँका अति विपन्न परिवारलाई खाद्यान्न वितरण गरेका छन् । ६५ विपन्न परिवारलाई प्रति परिवार २५ किलो चामल वितरण गरेको सहयोगी इन्द्र सावदले बताए ।
रावलले यसअघि ठाकुरबाबा र मधुवन नगपालिकामा ४ हजार ५ सय मास्क वितरण गरेका थिए । गरिव तथा विपन्नलाई सहयोग गर्न नगरले एकद्धार प्रणाली लागू गरेको छ ।
विपन्न परिवारलाई सक्दो सहयोग गर्नका लागि नगरपालिकाले सबै नगरबासीमा आह्वान गरेको छ । नगरपालिकाको आह्वान अनुसार नगरका विभिन्न संघ, संस्था तथा व्यवसायीहरुले विपत कोषमा रकम सहयोग गर्ने क्रम जारी रहेको नगरपालिकाले जनाएको छ ।
Discussion about this post