खड्क सुनार मुगु चैत ३० गते । हिमाली जिल्ला मुगुमा कार्यरत स्थानीय क्रियाशिल सञ्चारकर्मीहरु लाई शनिवार मास्क , सेनिटाईजर र सावुन सहयोग गरिएको छ । जिल्लाको एक मात्र छायानाथ रारा नगरपालिका मुगुले जिल्लाका पत्रकार लाई सो सामान सहयोग गरेको हो । कोरोनाभाइरस रोकथामका लागि अग्रपंक्तिमा रहेर समाचार संकलन गर्ने क्रियाशील संचारकर्मीहरुलाई राहत स्वरुप सरसफाइका सामग्री सहयोग गरिएको छ।
छायाँनाथ रारा नगरपालिकाले जिल्लामा क्रियाशील १६ जना संचारकर्मीलाई उपलब्ध गराउने गरी नेपाल पत्रकार महासंघ मुगु शाखालाई मास्क, सेनिटाइजर र डिटोल साबुन उपलब्ध गराएको हो।
नगर क्षेत्रका नगरबासीहरुका लागि ल्याइएका स्वास्थ्य तथा सरसफाइका सामानहरुको निरीक्षण तथा अनुगमन कार्यक्रममा नगरप्रमुख हरिजंग शाहीले जिल्लामा क्रियाशील पत्रकारहरुका लागि १ सय वटा सर्जिकल मास्क, ४४ वटा १ सय एमएल हेन्ड सेनिटाइजर र २० वटा डिटोल साबुन सहयोग गरेको जनाएका छन् ।
सूचना संकलन, प्रसारण तथा प्रकाशनमा उच्च पंक्तिमा काम गर्ने संचारकर्मीहरु महामारीको वेला पनि अग्रपंक्तिमा रही काम गर्दा बढी जोखिममा रहेकाले ढुक्क सँग समाचार संकलन गर्न सकू्न् भन्ने हेतुले मास्क, सेनिटाइजर र साबुन स्थानीय सरकारले उपलब्ध गराएको मेयर शाहीले बताए ।
कोरोनाभाइरस विरुद्घको लडाइँमा सँगसँगै हिंड्न र समाजमा सकारात्मक सन्देशको सूचना प्रवाह गर्न संचारकर्मीहरुलाई उनले आग्रह समेत गरे।
कार्यक्रममा संघीय सांसद गोपालबहादुर बमले कोरोनाको महामारी अझै नेपालमा नफैलिएकाले राहतमा भन्दा जनतालाई सरसफाइ र जनचेतनामा ध्यान दिने खालका कार्य गर्न स्थानीय सरकारहरुलाई सुझाव दिए ।
यो भन्दा भयावह अवस्था आउन सक्ने संभावना रहेकाले पछिका लागि जगेडा राखी काम गर्न र स्थानीय सरकारको प्रत्याभूति हुने गरी काम गर्न पनि उनले सुझाव दिए ।
कार्यक्रममा नेपाल पत्रकार महासंघ मुगु शाखाका अध्यक्ष नृपेन्द्र बहादुर मल्लले कोरोना विरुद्धको लडाइँमा जनता अप्रत्यक्ष र संचारकर्मी, सुरक्षाकर्मी, स्वास्थ्यकर्मी प्रत्यक्ष सिपाही भएकाले तिनै तहका सरकारहरुले प्रत्यक्ष सिपाहीको सुरक्षाका लागि चाहिने साधनका लागि कुनै पनि कसुर बाँकी राख्नु नहुने बताए ।
उनले जिल्लामा क्रियाशील पत्रकारहरुको स्वास्थ्य सुरक्षाको ख्याल गर्दै स्वास्थ्य, सरसफाइ सामग्री उपलब्ध गराएकोमा नगरपालिकालाई धन्यवाद समेत दिए ।
नगरपालिकाले नगरबासीका लागि ल्याएको मास्क, सेनिटाइजर र साबुन वितरणको शुरुवात संघीय सांसद बमलाई एक एक सेट सामान नगर प्रमुखबाट हस्तान्तरण गरेर शनिबारबाट सुरुवात गरिएको छ ।
पालिकाले ५ हजार ५ सय घरधुरीलाई पुग्ने सेनिटाजर, २ हजार ६ सय जनालाई पुग्ने मास्क र साबुन खरीद गरेको छ ।
Discussion about this post