बाँके कार्तिक ५ गते ।
भीडभाडकाबीच नेपालगन्जको जमुनाह नाकामा जिल्ला प्रशासन कार्यालयको सहकार्यमा असल शासन क्लव बासले नागरिक सहायता कक्ष स्थापना गरेको छ । भारतबाट नेपाल आउने र नेपालबाट भारत जाने व्यक्तिहरुले नाकामा विभिन्न दुख र समस्या झेल्न थालेपछि त्यसको सहजिकरणका लागि नागरिक सहायता कक्ष स्थापना गरिएको बासका कार्यकारी निर्देशक नमस्कार शाहले जानकारी दिनुभयो ।
कार्यक्रममा बोल्दै मेयर धवल शम्शेर रानाले नागरिक सहायता कक्षले अलमलमा परेका नागरिकहरुलाई सहजिकरण गर्न मद्दत गर्ने बताउनुभयो । नाकामा नागरिकहरुले समस्या झेल्न नपरोस् भन्ने उद्देश्यले स्थापना गरिएको सहायता कक्षले आफ्नो उद्देश्य पूरा गर्ने बताउनुभयो ।
बाँकेका सिडियो रामबहादुर कुरुम्वाङले नाकामा सुरक्षाकर्मी खटिएर नागरिकहरुलाई सेवा दिइरहेपनि अझ यसलाई प्रभावकारी गराउन नाकामा हेल्प डेस्क राखिएको बताउनुभयो । नागरिकहरुसँगको सहकार्य र समन्य बढाउन पनि डेस्क स्थापना गरिएको उहाँको भनाइ छ ।
हेल्प डेस्क संचालन गर्नेहरुले नागरिकहरुलाई सहजिकरण गर्ने भनिएपनि पहिलो दिन भने अस्तव्यस्त देखियो । सुरक्षाकर्मी भएपनि नाकामा राखिएको हेल्प डेस्कले पहिलो दिन भने प्रभावकारी भूमिका निर्वाह गर्न सकेको देखिएन् । उल्टै त्यहाँ भीडभाड देखियो । रोजगारीका लागि र औषधि उपचारका लागि जाने नेपालीहरु घण्टौं लाइन बस्न बाध्य भए । भीडभाडमा न मास्कको प्रयोग देखियो न त सामाजिक दूरीको पालनानै गरेको थियो । हेल्प डेक्समा बसेकी बासकी कर्मचारीले पहिलो दिन भएकाले व्यवस्थित गराउन नसकिएको बताउनुभयो ।
जनमत पार्टीका केन्द्रीय सदस्य इरफान अहमद शेषले स्थानीय प्रशासनले लापरवाहीले नाका अस्तव्यस्त बनेको बताउनुभयो । उहाँले यही कारण कोरोनाको जोखिम उच्च बनेको बताउनुभयो । स्थानीय प्रशासनले भीडभाड बनाएर नाकालाई कोरोना उत्पादनको थलो बनाएको आरोप लगाउनुभयो । उहाँले पार्टीले नाका खोल्न दवाव दिँदै आएको बताउनुभयो । नाका खोल्ने हो भने नागरिकहरुले सहजरुपमा आउजाउ गर्न पाउने र नाकामा भीडभाड नहुने बताउनुहुन्छ ।
उहाँले पटक पटक जिल्ला प्रशासन र बाँके प्रहरीलाई आफ्नो पार्टीले दवाव दिदै आएको बताउनुभयो । उहाँले बासले नाकामा स्थापना गरेको नागरिक सहायता कक्षको कुनै अर्थ नरहेको बताउनुभयो । सुरक्षा निकायले गर्ने काम संघसंस्थाले गर्नु अनावश्यक प्रचारबाजी भएको टिप्पणी गर्नुभयो । ठूलाबडाहरु पहुँचका आधारमा निर्वाधरुपमा नाकाबाट वारपार गर्ने र पहुँच नभएका स्थानीयलाई नाकामा दुख दिने गरेको उहाँको भनाइ छ ।
उहाँले नाकामा आम नागरिकहरुलाई सहज तरिकाले सेवा दिनु पर्ने धारणा राख्नुभयो । नेपालगन्जका जनप्रतिनिधि अयुव सिद्दिकीले भने नागरिक हेल्प डेस्कले जनतालाई सेवा दिनकै लागि स्थापना गरिएको बताउनुभयो । नाकामा हुने भीडभाडलाई कम गर्नकै लागि डेस्क स्थापना गरिएको बताउनुभयो ।
Discussion about this post