बाँके माघ १७ गते ।
नेपालगन्जको जमुनाह नाका करिव १० महिनापछि औपचारिक रुपमा खुल्ने भएको छ । यसअघि मानिसहरुलाई ओहोरदोहार गर्न दिइएपनि नाका औपचारिकरुपमा खुलेको थिएन् । कोरोना महामारीसंगै गरिएको लकडाउनका कारण बन्द रहेको ३० वटा नाकालाई सरकारले खुला गर्ने निर्णय गरेसँगै जमुनाह नाकापनि खोल्ने तयारी स्थानीय प्रशासनले गरेको हो ।
मन्त्रीपरिषद् बैठकले भारत तथा चीन तर्फका नाका खोल्ने निर्णय गरेको जानकारी दिएको हो । गृह मन्त्रालयले नाका खोल्ने निर्णयको सर्कुलर सम्बन्धित जिल्ला प्रशासनमा गरेको छ । गृहको पत्र आइसकेकाले स्वास्थ्य सुरक्षाका मापदण्ड पालना गरेर नाका खोल्ने तयारी गरिएको बाँकेका सिडियो रामबहादुर कुरुम्वांगले जानकारी दिनुभयो ।
विश्वभर तेस्रो चरणको कोरोना भाइरसको संक्रमण फैलिरहेकाले स्वास्थ्य सुरक्षाका मापदण्द भने पालना गर्नै पर्ने सिडियोको भनाइ छ । सिमानाका बन्द रहेको र खुलेको सरकारले आधिकारिक जानकारी नदिए पनि जमुनाह नाकाबाट आउतजाउत चल्दै आएको थियो । सरकारले यसअघि १४ नाका खोलेको थियो । जसमा १६ वटा थप गरिएको हो ।
नाका औपचारिक रुपमा खुलेपछि मापदण्डको पालना गर्दै सीमावर्ती बजारमा खरिद, बिक्रीका लागि नेपाली ओहोरदोहोर गर्न पाउने भएका छन् । खुलेका नाकाबाट नेपालीले निर्बाध र विदेशीले शर्त सहित पालना गरेर आवागमन गर्न पाउनेछन् । जिल्लामा आएको पत्र भने सिडियो कार्यालयले मातहतमा पठाएको छैन् । जस्का कारण नाकामा खटिने सुरक्षाकर्मीहरु नाका खुलेको हो होइन भन्नेबारे अन्यौलमा छन् ।
Discussion about this post