बाँके चैत २२ गते ।
बाँके जिल्लामा लगाइएको मकैमा अमेरिकन फौजी किरा लाग्न थालेपछि किसानहरू हैरान भएका छन् । हुर्कदै गरेको मकै बालीमा फौजी किरा देखिएपछि किसान चिन्तित बनेका हुन् ।
छोटो समयमै फौजी किराले बाली सखाप पार्ने भएपछि किसानले विषादी छर्कन सुरु गरेका छन् । बाँकेको राप्तीसोनारी गाउँपालिका ७ सर्रीका किसान चक्रबहादुर थापा १५ कठ्ठामा लगाएको मकैमा फौजी किराले आक्रमण गरेर हैरान गरेको बताउँछन् ।बाँकेको डुडुवा गाउँपालिका( ६ हिरमिनियाका किसान जयपाल मौर्यले ८० कठ्ठामा मकै लगाएका छन् ।
उनले लगाएको मकैमा पनि फौजी किराको प्रकोप देखिन थालेको छ ।जिल्लाभरि नै फौजी किरा देखिएपछि कृषि ज्ञान केन्द्र बाँकेले समस्या समाधानका लागि पहल थालेको जनाएको छ ।
विभिन्न संघ संस्था तथा निकायको सहयोगमा स्थलगत अनुगमन र निःशुल्क औषधिको व्यवस्था गरेको कृषि ज्ञान केन्द्र बाँकेका प्रमुख सागर ढकालले बताए । बाँकेमा यो वर्ष ३५ सय ५० हेक्टर क्षेत्रफलमा मकै रोपिएको छ ।
बाँकेमा मकैको पकेट क्षेत्रका रूपमा राप्तीसोनारी गाउँपालिका, खजुरा गाउँपालिका र नरैनापुर गाउँपालिकाका केही क्षेत्र छन् । यीबाहेक अन्य स्थानमा पनि निर्वाहमुखी मकै खेती गर्ने किसान बढिरहेका छन् ।
Discussion about this post