काठमाण्डौं असोज २४ गते । पहिलो ऐतिहासिक तमू अन्तरराष्ट्रिय सम्मेलन आजदेखि काठमाडौंमा सुरु भएको छ । तमू ह्युल छोज धी गुरुङ राष्ट्रिय परिषदको आयोजनामा भएको सो सम्मेलनको उद्घाट्न गर्नु हुदै प्रमुख अतिथि नेपालका पहिलो राष्ट्रपति डा. रामवरण यादवले तमूहरुबीच एकता कायम गर्दै विश्वमा सन्देश दिन तमू अन्तरराष्ट्रिय सम्मेलन सफल हुने विश्वास गर्नुभयो । साथै उहाँले नेपालको विभिन्न कालखण्डमा भएको आन्दोलनमा तमुहरुको विशेष योगदान रहेको समेत बताउनुभयो । सो सम्मेलनमा बोल्ने वक्ताहरुले तमूहरु बीचको एकता, सहअस्तित्व र पहिचानका लागि सशक्त ढंगले अघि बढ्न सम्मेलन सफल हुने विश्वास व्यक्त गरेका छन् ।
पूर्वराज्यमन्त्री तथा समाजसेवी भद्रकुमारी घलेले तमूहरुको भ्रातृत्व विकास गर्दै सामाजिक, आर्थिक, राजनीतिक जीवन परिवर्तन गर्नमा सम्मेलन सफलताको शुभकामना दिनुको साथै आफना सन्तानहरुलाई शिक्षामा जोड दिनु पर्ने बताइन् । त्यसैगरी, गैरआवासीय नेपाली संघ (एनआरएनए) का निवर्तमान अध्यक्ष डा.शेष घलेले तमूहरुबीचमा विश्वमा एकताको आवश्यकता रहेको र तमुको एकताले मात्र सफलता प्राप्त हुने बताए । कार्यक्रममा आदिवासी जनजाति उत्थान राष्ट्रिय प्रतिष्ठानका उपाध्यक्ष चन्द्रबहादुर गुरुङले सम्पूर्ण आदिवासी जनजातिको हकहित र संरक्षण गर्ने जिम्मेवारी पाएको प्रतिष्ठानप्रति नेपाल सरकारले प्रयाप्त बजेट विनियोजन नगरेकोमा चिन्ता ब्यक्त गर्नुभयो ।
नेपाल आदिवासी जनजाति महासंघका अध्यक्ष जगत बरामले आदिवासी जनजाति लगायत तमू समुदायप्रति सरकार र संविधान विभेदकारी रहेको आरोप लगाएका थिए । कार्यक्रममा एनआरएनएका सचिव जानकी गुरुङ, तमुधिँ यूकेका अध्यक्ष नन्दजंग गुरुङ, सिक्किमका गर्जमान गुरुङ लगायतले शुभकामना मन्तव्य दिएका थिए । सम्मेलनमा देश तथा विदेशका प्रतिनिधिहरुको सहभागिता रहेको छ । तमू अन्तर्रािष्ट्रय सम्मेलनको उद्घाटनपछि विभिन्न विषयमा विषयगत छलफल भएको थियो ।
पहिलो दिनको पहिलो सेसनमा सो परिचयात्मक कार्यक्रमको अध्यक्षता पूर्वअध्यक्ष तथा सल्लाहकार डा. गणेशमान गुरुङको अध्यक्षतामा हुनेछ । सो सेसन डा. रेमबहादुर गुरुङ र स्व.प्रा. सन्तबहादुर गुरुङप्रति समर्पित रहेको थियो । सो सेसनमा प्रत्येक देशको प्रतिनिधिले आ–आफ्नो संस्थागत परिचय प्रस्तुत गरेका थिए ।
पहिलो दिनको दोस्रो सेसन ‘एकता’ केन्द्रीत रहेको थियो । स्व.अडिबहादुर गुरुङप्रति समर्पित रहेको थियो । सो सेसनको अध्यक्षता नेपाल प्रज्ञा प्रतिष्ठानका उपकुलपति डा. जगमान गुरुङले गर्नु भएको थियो भने सेसनमा डा. टेकबहादुर गुरुङले तमु जातिको उत्पत्तिको इतिहास विषयमा कार्यपत्र प्रस्तुत गर्नुभएको थियो भने होमा थकाली गुरुङले टिप्पणी गरेकी थिईन् ।
सोही सेसनमा तमु जातिको संस्कार तथा संस्कृतिबारे मानवशास्त्री पोल गुरुङले कार्यपत्र प्रस्तुत गरेका थिए भने डा छाम्पामेघी लामा गुरुङले टिप्पणी गरेका थिए । पहिलो दिनको साँझ तमु कलाकार संघका कलाकारहरुले भव्य रुपमा सांस्कृतिक प्रस्तुति रहेको थियो । सो सम्मेलन तमू ह्युल छोज धी गुरुङ राष्ट्रिय परिषदका अध्यक्ष रेशम गुरुङको अध्यक्षतामा भएको थियो भने कार्यक्रमको सन्चालन सूर्य गुरुङ र अनिता गुरुङले गरेका थिए ।
Discussion about this post