बाँके मंसिर १४ गते ।
कोहलपुर नगरपालिकाले नगर क्षेत्रमा अवव्यस्थित रुपमा सञ्चालन रहेका अटोरिक्साहरुलाई कारवाही गर्न थालेको छ । अटो तथा विद्युतीय रिक्सा सञ्चालन, व्यवस्थापन तथा नियमन सम्बन्धी कार्यविधि २०७९ अनुसार कोहलपुर नगरपालिका पटक पटक सूचना जारी गर्दा समेत अटो रिक्साहरुले अटेरी गरेपछि कारवाहीको प्रक्रिया अगाडि बढाइएको कोहलपुर नगरपालिकाका नगर प्रहरी प्रमुख वीरबहादुर थापाले जानकारी दिए ।
बुधवार दर्ता नभएका २२ वटा अटोरिक्सालाई कारवाही गरिएको छ । यसअघि मंगलवार ८ वटालाई कारवाही गरिएको थियो । दुई दिनको अवधिमा ३० वटा अटोरिक्सालाई कारवाही गर्दा १५ हजार जरिवाना असुल गरिएको पनि थापाले बताए । अटोरिक्साहरु सवारी चालक अनुमति पत्र बिना चल्ने, रुट प्रमिट बिना चल्ने, दर्ता नगर्ने, नविकरण नगर्ने, र लाइसेन्स नभएका अटोरिक्साहरुलाई कारवाही गरेका उनले बताए ।
अटोरिक्साहरुले मनपरी तरीकाले जथाभावी पार्किङ्ग गर्ने, तीव्र गतिमा चलाउने जस्ता गतिविधि गरेपछि नगरपालिकाको कार्यविधि अनुसार काम कारवाही सुरु गरेको नगर प्रमुख प्रमुख थापाले जानकारी दिए । थापाका अनुसार कोहलपुर चौराहदेखि ३ रुट छुट्याउँदै चौराहदेखि ४६ स्थानको भाडादर समेत छुट्याइएको छ, तर अटोरिक्साहरुले भाडादर नराखी मनपरी तवरले भाडा लिएको बताए ।
नगरभित्र सञ्चालन हुने अटोरिक्साहरुमा कोहलपुर नगरपालिकाले तोकेको भाडादर अनिवार्य हुनुपर्ने र अन्यथा कारवाहीको प्रक्रियामा लैजाने बताए । कोहलपुर नगरपालिकामा हालसम्म ६७ वटा अटोरिक्साहरु दर्ता भएका छन् । २ सय ५० भन्दा बढिले दर्ताको प्रक्रियालाई अगाडि बढाएको नगर प्रहरी प्रमुख थापाले बताए । कोहलपुर नगर क्षेत्रमा ८ सय भन्दा बढी अटोरिक्साहरु रहेको अनुमान गरिएको छ ।
Discussion about this post