बाँके माघ १० गते ।
नेपालगन्ज भन्सार कार्यालयलाई चालु आर्थिक वर्षको ६ महिनामा लक्ष्य अनुसारको राजश्व संकलन गर्न हम्य–हम्य परेको छ । विगतमा राजश्व असुलीमा योगदान गरेका सामाग्रीमा आयातमा कमी आउँदा राजश्व लक्ष्य अनुसार संकलन हुन नसकेको नेपालगन्ज भन्सार कार्यालयका सूचना अधिकारी पूर्णप्रसाद लम्शालले जानकारी दिए ।
भन्सार शुल्क बढी लाग्ने सामानको आयात दर घट्दा लक्ष्य अनुसारको राजश्व संकलन गर्न कठिनाई भएको उनको भनाइ छ । राजश्व संकलनमा योगदान दिँदै आएका चामल, सुपारीलगायतका केही बस्तुको आयात घटेका कारण राजश्व संकलन प्रभावित बन्न पुगेको हो । राजश्व सोचेअनुसार संकलन हुन नसक्नु चोरी, तस्करी पनि मुख्य रहेको स्थानीयको भनाइ छ । आयातको कमीले देशभरका भन्सारले लक्ष्य अनुसार राजश्व संकलन गर्न नसकेको उनको दावी छ ।
भन्सार कार्यालयले चालु वर्ष २०८०÷८१ को साउनमा एक अर्व ८६ करोड ३० लाख लक्ष्य लिएकोमा एक अर्व ४१ करोड ४० लाख मात्र असुली गरेको छ । यस्तै भदौंमा दुई अर्व २२ करोड १४ लाख लक्ष्य लिएकोमा एक अर्ब ४५ करोड ११ लाख, असोजमा दुई अर्व ४४ करोड ५३ लाख लक्ष्य लिएकोमा एक अर्ब ४८ करोड ६० लाख, कात्तिकमा दुई अर्व ३८ करोड ९१ लाख लक्ष्य लिएकोमा एक अर्व २४ करोड २१ लाख, मंसिरमा दुई अर्व ५२ करोड लाख ३६ लाख लक्ष्य लिएकोमा एक अर्ब ५५ करोड ८९ लाख मात्रै राजश्व असुली गरेको छ । पुस महिनामा दुई अर्व ५६ करोड ६० लाख लक्ष्य लिएकोमा एक अर्व ५३ करोड ५५ लाख मात्रै राजश्व असुली भएको छ ।
खुल्ला सिमाका कारण भारतबाट अबैध रुपमा माल सामान पैठारी भएर आउने क्रम नरोकिएको भन्सार अधिकारीहरु बताउँछन् । ‘सुरक्षाकर्मीको सहयोगमा हामीले अबैध पैठारीलाई कडाई त गरिरहेकै छौं, तरपनि दुई देशबीचको खुल्ला सिमाना छ, करिव ६५ किलोमिटर बोर्डर क्षेत्र पुरै खुल्ला छ, त्यसकारण अबैध पैठारी नियन्त्रण गर्न चुनौतीपुर्ण छ,’ भन्सार अधिकारी बताउँछन् । तर गत आर्थिक वर्ष भन्दा राजश्व असुली बढी नै देखिएको पनि सूचना अधिकारी लम्शाल बताउँछन् ।
Discussion about this post