बाँके माघ २० गते ।
क्यासिनोको सहरको रुपमा नेपालगन्जले परिचय बनाउन थालेको छ । क्यासिनो खेल्न दैनिक सयौँ भारतीय नेपालगन्ज आउँछन् । क्यासिनो खेल्नेहरुले नेपालगन्जको ब्यापार, ब्यवसायलाई चलायमान बनाएका छन् । यसले भारतीय रुपैयाँ आर्जन भइरहेको छ । तर, क्यासिनो खेल्न नेपालगन्ज आउने भारतीयले विभिन्न खाले झमेला झेल्नु परिरहेको छ ।
उनीहरुलाई नेपालगन्ज नाका छिर्ने बेलादेखि नै सास्ती खेप्नुपर्ने हुन्छ । जमुनाह नाकामा जाँच गराए लगत्तै भन्सारमा खटिएका सुरक्षाकर्मीको केरकारमा पर्छन् उनीहरु । त्यसपछि जयसपुर, चौलिका हुँदै ट्राफिक चोकमा उनीहरुलाई जाँच गरिन्छ ।
एउटा निकायले गरेको कामको अर्को निकायले विश्वास नमानेका कारण त्यसको मार भारतीयहरुले खेप्न परिरहेको छ । ‘एक ठाउँमा मात्र जाँच गर्ने भए आउजाउ गर्न सहज हुन्थ्यो । यस्तो ब्यवस्था गरिदिएको भए अझ धेरै भारतीय क्यासिनो खेल्न नेपालगन्ज आउने थिए,’ क्यासिनो खेल्न नेपालगन्ज आउँदै गरेका एक भारतीयले भने, ‘ठाउँ–ठाउँमा जाँच गराउनु पर्दा वाक्क लाग्छ । नेपालगन्ज आउने मन मरेर आउँछ ।’
नेपालगन्जमा एक दर्जन क्यासिनो संचालनमा छन् । यी क्यासिनोले राज्यलाई वार्षिक दुई करोडभन्दा बढि राजस्व बुझाउँछन् । यहि क्यासिनोले नेपालका सयौँ यूवालाई रोजगारी पनि दिएका छन् नै नेपालगन्जको ब्यापार ब्यवसायलाई चलायमान बनाउन सघाएका पनि छन् । ‘क्यासिनाले नेपालगन्जलाई फाइदा पुर्याएको छ । यहाँ आएका भारतीयहरु होटलमा बस्छन्, चिया, कफी, खाना खाएर नेपालगन्जको ब्यापारलाई प्रवद्र्धन गरिरहेका छन्,’ एक होटल ब्यवसायीले भने ।
यहाँका क्यासिनोको ब्यवस्थापनका लागि बाँके प्रहरीले निगरानी गरिरहेको छ । गैर नेपालीलाई प्रवेश गर्न नदिन र अवैध भारतीय रुपैयाँ प्रयोगमा ल्याउन नदिन समय समयमा अनुगमन गर्दै आएको बाँकेका प्रहरी प्रवक्ता डिएसपी नारायण डाँगीले बताए ।
बाँके प्रशासनले पनि निगरानी गर्दै आएको छ । क्यासिनोहरु के कसरी संचालन भइरहेका छन् भन्ने विषयमा नजिकबाट हेरिरहेको बाँकेका प्रमुख जिल्ला अधिकारी श्रवणकुमार पोखरेलले बताए । उनले नियमित रुपमा अनुगमन र निरीक्षण भइरहेको जानकारी दिए ।
Discussion about this post