बाँके चैत १९ गते ।
तत्कालिन एसपीको सिको गर्दै सशस्त्र प्रहरी वल नं. ३० गण हेडक्र्वाटर, बागेश्वरीका एसपी विमल डाँगीले पनि नेपालगन्ज नाकामा आतंक मच्चाएका छन् । उनले गृहमन्त्रीको निर्देशनलाई लत्याउँदै घुमुवा राखेर असुली धन्धामा लगाएको खुलासा भएको छ ।
उनले ठूला तस्करसँग मिलेर तस्करी गराउने र घर खर्चका लागि ल्याउने सर्वसाधारणको सामान खोस्ने र तर्साउने रणनीति अपनाएका छन् । ‘सानालाई ऐन, ठूलालाई चैन’ भन्ने नेपाली उखानलाई चरितार्थ गर्दै एसपी डाँगीले घर खर्चका लागि ल्याउने सामान खोसेको कडाई गरेको देखाउँदै आएका छन् ।
नाकामा खटिएका सशस्त्र प्रहरीले भारतबाट सामान ल्याउन कडाई गरेको देखाएर सर्वसाधारण नागरिकलाई दिग्भ्रमित बनाउने काम गरिरहेको प्रत्यक्षदर्शी बताउँछन् । ‘सशस्त्र प्रहरीले छोरी कुटेर बुहारी त्रसाएको जस्तो गरिरहेको छ,’ एक प्रत्यक्षदर्शीले नाम उल्लेख नगर्ने शर्तमा भने, ‘यहाँ सानालाई ऐन, ठूलालाई चयन भन्ने उखान सशस्त्रको ब्यवहारले देखाई रहेको छ ।’
घर खर्चका लागि ल्याउने सामानमा आँखा लगाउन सशस्त्र प्रहरीका एसपी डाँगीले घुमुवा परिचालन गरेका छन् । उनले घुमुवा प्रहरी मार्फत तस्करबाट मोटो रकम लिएको स्वयम तस्करहरु बताउँछन् । ‘हात्तिको चपाउने र देखाउने दाँत फरक भए जस्तै सशस्त्र प्रहरीका एसपी डाँगीले सर्वसाधारणलाई त्रसाएर तस्करहरुसँग मोटो रकम असुलीको पाइन्छ,’ एक सर्वसाधारणले भने, ‘जो पनि सोझासादा नागरिकलाई दुख दिने र तस्करहरुसँग मोटो रकम लिने मात्र नाकामा आउँछन् । हामीले सधैँ दुख मात्र पाउने भयौँ ।’
घुमुवाले नै तस्करको स्कटिङ गरेर सुरक्षित रुपमा सामान ल्याउन सहयोग गर्दै आएका छन् ।
‘गरिव, निमुखा, विपन्नको सामान खोसेर भन्सारमा दाखिला गर्ने सशस्त्रका घुमुवाले तस्करसँग मोटो रकम लिएर मोटरसाइकलमा स्कटिङ गरि सुरक्षित रुपमा सामान लैजान मद्दत गरिरहेका छन्,’ एक प्रत्यक्षदर्शीले भने, ‘रकम हुनेहरु सशस्त्र प्रहरीसँग मिलेर अवैध रुपमा सामान भित्र्याइरहेका छन् । हामी गरिव र विपन्नहरु घर खर्चका लागि लैजाँदासमेत खोसिदिन्छन् । यो देशमा ‘सानालाई ऐन, ठूलालाई चैन’ छ ।’
एसपी डाँगीले गृह मन्त्री रवी लामिछानेको निर्देशन लत्याउँदै कृष्णबहादुर विक, हर्कहादुर थापा, निर्मल खत्री र दिलबहादुर अधिकारीलाई घुमुवाको रुपमा परिचालन गरेका छन् । त्यस्तै बिओपी जमुनाहबाट गगन हमाल, शेर बहादुर कार्की घुमुवाको रुपमा खटिएका छन् ।
यी घुमुवाले सर्वसाधारणको सामान खोसेर जम्मा पारेर राख्ने र तस्करीको सामान भनेर प्रचारबाजी गर्दै आएका छन् । आफूले अवैध सामान बरामद गरेको देखाउन एसपी डाँगीले जिल्लाको विभिन्न विओपीले सर्वसाधारणबाट खोसेको सामान खोसेर मिडियाबाजी गर्दै आएको पीडित बताउँछन् । ‘विशुद्ध घर खर्चका लागि ल्याउँदै गरेको सामान हामीबाट खोसेर सशस्त्र प्रहरीका एसपी डाँगीले तस्करीको सामान भनेर मिडियाबाजी गर्दै आएका छन्,’ एक पीडितले भने, ‘सक्छौँ भने तस्करको सामान बरामद गरेर देखाऊ । सर्वसाधारणको सामान खोसेर बहादुरी नदेखाऊ ।’
भरपर्दो स्रोतका अनुसार, एसपी डाँगीले कल्लु, जाबिर, संजय, नसरुद्दिन, मोनु, बन्टी, सोनु, सुक्खा, मुन्ना, भौती, अब्दुल, नानू, भर्कत लगायत तस्करलाई लाइन दिएका छन् । यी तस्करले सशस्त्र प्रहरीलाई मोटो रकम दिएर दिनरात भारतबाट सामान भित्र्याउँदै आएको खुलेको छ ।
नेपाल–भारत सीमा अन्तरगत बाँकेको खडैचा, कालाबन्जार, जमुनाह, जयसपुर, इच्छाराम बाबा मन्दिर पछाडीको भाग, पचपोखरा, साईगाउँ, बढैया, सैनिक लगायतका सहायक नाका चोरी तस्करीका लागि प्रमुख सहायक नाका मानिन्छन् ।
यी ठाउँमा विओपीसँगै पाँच सय मिटरको दूरीमा सशस्त्र प्रहरीले ड्यूटी दिन्छन् । सशस्त्र प्रहरीले एक छाक खानका लागि ल्याउने समान खोस्छन्, तर तस्करको सामान कहिलै समात्दैनन् । ‘तस्करहरुले खुलेआम ल्याउँदा पनि नाकामा खटिएका सशस्त्र प्रहरी नदेखेझैँ गरि गर्छन्,’ एक पीडितले अनलाइन खोजखवरसँग भने ।
Discussion about this post