बाँके साउन ३ गते ।
नेपालगन्ज उपमहानगरपालिका–१५ जमुनाह नाकनबाट लागु औषधसहित विहीबार दुई जना पक्राउ परेका छन् । नेपालगन्ज उपमहानगरपालिका–१० आर्दशनगर बस्ने ३८ वर्षीय विनम्र श्रेष्ठ र ३५ वर्षीय दिपेश क्षेत्रीलाई १० ग्राम व्राउन सुगरसहित पक्राउ गरिएको प्रहरीले जनाएको छ ।
रुपैडियाबाट भे ५ प १२०८ नम्वरको मोटरसाइकलमा नेपालगन्ज आउदै गरेको अवस्थामा जमुनाह चेक पोष्टमा उनीहरु पक्राउ परेका हुन् । उनीहरुको गतिविधि शंकास्पद देखिएपछि जमुनाह प्रहरी र लागु औषध व्यूरोको टोलिले चेकजाँच गरेको थियो ।
त्यसक्रममा श्रेष्ठले लगाएको पाइन्टको बाँया खल्तमा सुपर पावर सुर्तिको प्याकेट भित्र पाँच वटा सेतो प्लाष्टिकमा पुरिया पारेर लुकाईएको अवस्थामा ब्राउन सुगर बरामद गरिएको बाँकेका प्रहरी प्रवक्ता डिएसपी नारायण डाँगीले जानकारी दिए । प्रहरीले स्कुटी र दुई वटा मोवाइल समेत बरामद गरेको छ । उनीहरुमाथि थप अनुसन्धान भइरहेको पनि प्रहरीले जनाएको छ ।
बाँकेका एसपी तुलबहादुर कार्कीको कडा निर्देशन पछि जमुनाह प्रहरीले लागु औषध कारोवारी र प्रयोगकर्तामाथि निगरानी बढाएको छ । जमुनाह प्रहरी इन्चार्ज सई रविन्द्र बहादुर बम लागु औषध तथा तस्कर नियन्त्रणमा आफै खटिने गरेका छन् । पछिल्लो समय दैनिक जस्तो लागु औषध कारोवारी तथा प्रयोगकर्ताहरु पक्राउ पर्दै आएका छन् । भारतसँगको खुला सीमाका कारण सहज आउजाउ हुँदा लागु औषधको कारोवार बढीरहेको छ । लागु औषध कारोवार नियन्त्रण र रोकथामका लागि सई बमको नेतृत्वमा कडाइका साथ चेकजाँच भइरहेको छ ।
Discussion about this post