बर्दिया मंसिर ४ गते ।
बर्दिया तुलसीपुरका रामबहादुर बुढा व्यावसायिक केरा खेती गरेर गाउँमै सबैभन्दा बढी आम्दानी गर्ने किसानका रुपमा परिचित छन् । बुढाले व्यावसायिक केराखेती गर्न थालेको ६ वर्ष हुन लाग्यो । परम्परागत कृषि कार्यलाई आधुनिक तौरतरिका अपनाइ उनले केरा खेतीलाई बढाउँदै आएका छन् ।
उनले सोल्टी फार्म स्थापना गरेर त्यसैबाट केरा खेती गर्दै आएका छन् । एक बिघा जग्गामा व्यावसायिक केराखेती गरिएको उनले बताए । उनले ५ हजार २ सय केरा रोपेका छन् । यसबाट वार्षिकरुपमा १२ लाखसम्मको केरा बिक्री हुने गरेको छ । केराखेतीका लागि बिरुवा रोप्ने, गोडमेल गर्ने, सिँचाइ गर्ने र बजार व्यवस्थापनको कार्यमा बुढा आफैँ खटिदै आएका छन् ।
“आवश्यक परेका बेलामात्रै ४÷५ जना मजदुरलाई ज्यालादारीमा काममा राख्दै आएका छौँ”, उनले भने, “बाँकी समय आफैँ कार्य गर्छौं ।” केरा खेतीलाई उनले ६ वर्षदेखि अपनाउँदै आएका छन् । “विदेश जानुभन्दा यही नै केही गरौं भनेर केराखेती सुरु गरे”, उनले भने, “ विदेशको गुलाम हुनु भन्दा यही ठिक छ ।”
उनले जिनाइ जातका केरा लगाएका छन् । धान मकै वाली भन्दा दोब्बर आम्दानी हुने गरेपछि केरा खेतीबाट सन्तुष्ट रहेको उनले बताए । उनले उत्पादन गरेको केरा अधिकांश नेपालगन्जमा खपत हुने गरेकोे छ । गाउँमै खपत भइरहेको छ । चैत वैशाख, जेठ, असार, साउन भदौ सिजनमा केरा महंगोमा विक्री हुने गरेपनि जाडोयाममा भने कम विक्री हुने उनले बताए ।
Discussion about this post