बाँके मंसिर १९ गते ।
पछिल्लो समय बाँकेमा तस्करी फेरि मौलाएको छ । बाँकेको अधिकांश सीमा नाकामा तस्करको रजगज छ । तस्करहरुले लाइन मिलाएपछि नाकामा खटिएका सुरक्षाकर्मीहरु आँखा चिम्लिदिँदा तस्करहरुको रजगज चलेको हो ।
बाँकेको मुख्य नाका जमुनाहमा कडाई गरिए पनि सहायक नाकाबाट तस्करले खुलेआम अवैध सामान भित्र्याइरहेको स्थानीय बताउँछन् । अवैध सामान ल्याउन तस्करहरुलाई नाकामा खटिएका सुरक्षाकर्मीले सघाइरहेको एक प्रत्यक्षदर्शीले बताए ।
पछिल्लो समय नाकामा खटिएका सुरक्षाकर्मी कमाउ धन्दामा लागेका छन् । कतिपय प्रहरी प्रमुखको कार्यअवधि पुग्न लागेकोले कमाउ धन्दामा लागेको खुलेको छ । ‘दरवन्दीमा आएको केहि महिनासम्म कडाई गर्ने प्रहरी प्रमुख कार्यअवधि सकिनेबेला तस्करसँग मिलेर कमाउ धन्दामा लाग्छन्,’ तस्करका एक नाइकेले अनलाइन खोजखवरसँग भने, ‘यो अहिलेमात्र भएको होइन, पहिलेदेखि चल्दै आएको रिति हो । नाकामा रहेका अहिलेका प्रहरी प्रमुखले पनि त्यहि गर्दै छन् । नाकामा खटिएका प्रहरी प्रमुखको यो चलन चल्तीको काम जस्तै हो ।’ सशस्त्र प्रहरी बलका विओपीका प्रमुख समेत कमाउ धन्दामा लागेका छन् ।
बाँकेको सुदूर पूर्वमा रहेको नरैनापुर, गंगापुर, होलिया, खडैचा, हिरमिनिया, आइसिपीको पुर्वतर्फ सुख्खा बन्दरगाह इच्छाराम बाबा मन्दिर पछाडी जयसपुर, पश्चिमतर्फ पचपोखरा, साइगाउँ, बडैया लगायत विओपीका प्रमुखले तस्करलाई सघाईरहेको स्वयम तस्कले अनलाइन खोजखवरलाई जानकारी दिए ।
नेपालगन्ज भन्सार कार्यालयको ब्यारियल जमुनाह नाका नजिक सारेर बाँके प्रशासनले समेत नेपालगन्ज नाकाबाट हुने तस्करीलाई टेवा पुर्याएको छ । यो ब्यारियल हटाउन बाँकेका प्रमुख जिल्ला अधिकारी (सिडिओ) खगेन्द्रप्रसाद रिजाल आफै खटिएका थिए । भन्सार कार्यालय अगाडीको ब्यारियलले सर्वसाधारणलाई सास्ती भएको बहाना बनाएर बाँकेका सिडिओ, बाँके प्रहरी प्रमुख, सशस्त्र प्रहरी प्रमुखको टोली ब्यारियल हटाउन खटिएका हुन् ।
अहिले सारिएको ब्यारियल इलाका प्रहरी कार्यालय जमुनाहको रातोघरभन्दा पनि दक्षिणमा छ । उक्त ब्यारियलभन्दा उत्तर–पूर्वमा जमुनाह र पिप्रहवाबाट आउने पक्की बाटो छ । नेपाल प्रहरी र सशस्त्र प्रहरीको टोली उक्त ब्यारियलमा बस्दा नेपालगन्ज भन्सार कार्यालयको क्वार्टरको पखालसँगै रहेको सडक तस्करहरुले प्रयोग गर्न थालेका छन् ।
त्यसैगरि, बाँकेका प्रमुख जिल्ला अधिकारीको ठाडो निर्देशनमा भन्सार कार्यालय अगाडी रहेको ब्यारियल जमुनाह नजिक सारिएपछि तस्करहरु भन्सारको पूर्वतर्फको बाटोबाट सुर्खेत रोड हुँदै तस्करीको सामान नेपालगन्ज पुर्याउने गरेको प्रत्यक्षदर्शी बताउँछन् । ‘भन्सार कार्यालयको ब्यारियल जमुनाहमा सारेपछि तस्करहरुलाई पुरानो भन्सार कार्यालयको अगाडीको बाटो भएर अवैध रुपमा सामान नेपालगन्ज पुर्याउन सहज भएको छ,’ एक प्रत्यक्षदर्शीले भने, ‘ब्यारियल सार्नुमा पनि केहि न केहि खोट अवश्य छ ।’
सशस्त्र प्रहरीको बिओपीलाई तस्करहरुले महिनावारी बुझाएर तस्करले अवैध रुपमा सामान भित्र्याउँदा राज्यलाई दैनिक लाखौं रुपैयाँ राजस्व घाटा भइरहेको छ । सशस्त्र प्रहरीलाई महिनावारी बुझाएर तस्करले दैनिक करोडौँ रुपैयाँ बराबरको अवैध सामान भित्र्याइरहेको प्रत्यक्षदर्शी बताउँछन् ।
राज्यले सशस्त्र प्रहरीलाई भारतबाट भित्रिने अवैध सामान भित्र्याउन रोक्ने जिम्मेवारी दिएको छ । नेपाल–भारत सीमानाकामा सशस्त्र प्रहरीलाई खटाएर देशको राजस्व बढाउने नीति राज्यले लिए पनि त्यसको ठिक विपरित बाँकेको सीमामा खटिएका सशस्त्र प्रहरीले गरिरहेका छन् ।
सशस्त्र प्रहरी बल नं. ३० गण हेक्वार्टर बागेश्वरीका गणपति एसपी विमल डाँगी तस्करबाट पैसा खाए न खाएको पुष्टि नभए पनि उनको रवैया देखेर स्थानीयले उनले पनि हात बढाएको स्थानीयको आशंका छ । ‘पाइलै पिच्छे सशस्त्र प्रहरीले ड्यूटी दिए पनि तस्करीको सामान नेपालगन्जबाट बरामद हुनुले एसपी डाँगीको पनि हात छ भन्ने आशंका गर्ने ठाउँ छ,’ एक स्थानीयले भने ।
नेपाल प्रहरीले तीन महिनाको अवधिमा ठूलो परिमाणमा अवैध सामान बरामद गर्नुले पनि सशस्त्र प्रहरीले तस्करबाट मोटो रकम लिएर सामान ल्याउन दिएको पुष्टि गरेको छ । सर्वसाधारणले घर खर्चका लागि ल्याउँदै गरेको सामान जफत गरेर तस्करबाट बरामद गरेको भन्दै प्रचारबाजी गर्दै आएको छ । ठुला तस्करबाट महिनावारी पैँसा लिएर तस्करी गराउँदै आएको बिषयमा एसपी डाँगीसँग पटक–पटक बुझ्न खोज्दा उनले प्रयोग गर्दै आएको ९८५१२७२११७ सरकारी नम्बरको मोवाइल फोन उठेन ।
सशस्त्र प्रहरी सेटिङमा भित्र्याउँदै नेपाल प्रहरी धमाधम नेपालगन्जबाट बरामद गरि नेपालगन्ज भन्सार कार्यालयमा दाखिला गर्दै आएको छ । तीन महिनामा दुई करोड ८४ लाख २४ हजार २३७ रुपैयाँ बराबरको अवैध सामान बरामद गरि नेपालगन्ज भन्सार कार्यालयलाई बुझाएको बाँके प्रहरीले जनाएको छ । भन्सार छली गरेर भित्र्याइएको सामान गोप्य सूचनाको आधारमा छापा मार्दै आएको बाँकेका प्रहरी प्रमुख एसपी तुलबहादुर कार्कीले बताए ।
Discussion about this post