बाँके माघ १० गते ।
राजनीतिक दलका नेताको दवावका कारण नेपालगन्ज उपमहानगरपालिका–२१, विर्ताका २२ वर्षीय अरबी खाँको हत्यामा संलग्नलाई प्रहरीले पक्राउ नगरेको आफन्तले आरोप लगाएका छन् । उनको १८ चैत, २०८० मा निर्मम तरिकाले घाँटी रेटेर हत्या भएको थियो । किटानी जाहेरी दिँदा समेत विभिन्न बहाना बनाएर प्रहरीले आरोपित ब्यक्तिलाई पक्राउ नगरि उन्मुक्ति दिएको अरवी खाँकी आमा राविया खाँले बताइन् ।
प्रहरीले अनुसन्धानको नाममा हत्यारालाई उन्मुति दिएको भन्दै परिवार र स्थानीयले प्रहरी, प्रशासनको कडा आलोचना गरेका छन् । हत्या भएको १० महिना वित्दासमेत प्रहरीले संलग्नहरुलाई पक्राउ गर्नुको साटो संरक्षण गरेको आरोप उनीहरुको छ । प्रहरीले न्याय दिनुको साटो परिवारका सदस्यलाई अनाहकमा दुख दिएको बताउँदै आमा रावियाले न्याय नपाएपछि सडक आन्दोलनमा आउन बाध्य भएको बताइन् । राजनीतिक दलका एक जना नेताका कारण प्रहरीले हत्याराको संरक्षण गरेको उनको आरोप छ ।
मृतक अरवी खाँका परिवार र स्थानीयले प्रहरी, प्रशासनले हत्यारालाई कारवाही नगरे नेपालगन्ज ठप्प पार्ने चेतावनी दिएका छन् । आन्दोलनबाट हुने क्षतिको जिम्मेवारी स्वयम प्रहरी र बाँके प्रशासनले ब्यहोर्नु पर्ने अरवी खाँका काका अब्दुल रहमानले स्पष्ट पारे ।
अरवी खाँको हत्यामा स्थानीय मेराज खाँको संलग्नता भएको दावी गर्दै आएका छन् । प्रहरीले हत्यारासँग साँठगाठ गरेको दावी परिवारका सदस्यले गरेका छन् ।
किटानी जाहेरी गरेको ब्यक्तिलाई पक्राउ गर्नुको साटो अरुलाई पक्राउ गरि प्रहरीले न्याय माथि खेलवाड गर्दै आएको अरवी खाँका काका रहमानले बताए । उनले प्रहरीले घुस खाएर अनुसन्धानलाई फितलो बनाएको आरोप लगाए । सबुत प्रमाण हुँदाहुँदै प्रहरीले हत्यारालाई उन्मुक्ति दिन खोजेको भन्दै उनले प्रहरीको नियतमाथि आशंका गरे ।
Discussion about this post