बाँके माघ १२ गते ।
एकपछि अर्को विवादको चपेटामा परिरहेको नेपालगन्जस्थित दारुल उलुम जामा मस्जिद इदगाहले बाँके प्रशासनको सक्रिय प्रयास पछि नयाँ कार्यसमिति पाएको छ । हाजी रहमान मियाको अध्यक्षतामा गठन भएको समितिमा हाजी रौनक अलिलाई उपाध्यक्षको जिम्मेवारी दिइएको छ । त्यसैगरि, महासचिवमा अनुद्दिन अन्सारी र कोषाध्यक्ष मोहम्मद हुसेन हल्वाई चयन भएका छन् ।
गएको माघ १ गते गुपचुप ज्याउल हक हलवाईको अध्यक्षतामा १७ सदस्यीय कार्यसमिति गठन गरि सार्वजनिक भएपछि त्यसको चौतर्फी विरोध भएको थियो । केहि समयदेखि विवादको चपेटामा रहेको जामा मस्जिदले नयाँ समिति पाएसँगै एक खालको निकास पाएको छ । नयाँ कार्यसमिति चयनसँगै ८ वर्षदेखि हुँदै आएको भ्रष्टाचारको छानविन गरिने भएको छ ।
नयाँ समितिले जामा मस्जिदलाई ब्यवस्थित बनाउने, अनियमितता रोक्ने, संस्थाको लेखा परिक्षण गराउने र नविकरण गराउने भएको छ । नयाँ कार्यसमिति चयन भएसँगै जामा मस्जिदको सम्पत्तिमाथि नजर लगाउने राजनीतिक दलका नेतालाई सामाजिक बहिस्कार गर्ने आवाजसमेत मुस्लिम समुदायमा उठेको छ । दारुल उलूम फैजुन्नबी जामा मस्जिद इदगाह संचालक समितिमा १ हजार ९ सय २७ जना सदस्य रहेका छन् ।
आठ वर्षसम्म साधारण सभा गर्न नसकेको भन्दै बाँके प्रशासनले समिति भंग गरि तदर्थ समिति गठन गरेको तीन महिनापछि राजनीतिक दलका नेता, कार्यकर्ताले भरिएको समिति गठन भएपछि चर्को विवादका बाबजुद जामा मस्जिदले नयाँ संचालक समिति पाएपछि समितिका साधारण सदस्यहरु खुसी भएका छन् । राजनीतिक दलका एक नेताको नेतृत्वमा कोठे अधिवेशनमार्फत नयाँ कार्यसमिति चयन गरिएपछि मुस्लिम समुदाय विरोधमा उत्रिएका थिए ।
नेपालगन्जका मुस्लिम अगुवाहरु उक्त समिति भंग गर्न माग गर्दै बाँकेका प्रमुख जिल्ला अधिकारीलाई ज्ञापन पत्र समेत बुझाएपछि अहिले फेरि अर्को समिति गठन भएको हो । प्रशासनको सक्रियता र स्थानीयको विरोधपछि आफ्ना नेता, कार्यकर्तालाई जामा मस्जिदमा भर्ति गर्ने ति नेताको अभियान असफल भएको छ ।
तेस्रो साधारणसभा गरेर १ हजार ९ सय २७ जना सदस्य रहेको जामा मस्जिदमा १ सय ५१ जनाको उपस्थिती गराई अवैधानिक तरिकाले मूल समिति नै गठन गरेपछि साधारण सदस्यहरु पुनः निर्वाचनको माग गर्दै प्रमुख जिल्ला अधिकारी र नगर प्रमुखलाई ज्ञापनपत्र बुझाएका थिए । निर्वाचन गराउने भनी गठन भएको निर्वाचन समितिका संयोजक सलिम हल्वाई (बाबु) ले आफनो घरमा बसेर मूल समिति गठन गर्दै आफै मूल समितिको कोषाध्यक्ष बनेका थिए । कतिपय भंग गरिएको कार्यसमितिकै पदाधिकारी समेत हलवाईको नेतृत्वमा चयन भएका थिए । प्रशासनले हस्तक्षेप गरेर समितिमा नयाँ नेतृत्व आएपछि उनीहरुको निदहराम भएको छ ।
यो पनि पढ्नुहोस् ।
धार्मिक संस्थामा राजनीतिकरण : जामा मस्जिद संचालक समितिमा दलका कार्यकर्ता भर्ती
Discussion about this post