बाँके फागुन २८ गते ।
निर्वाचन सकिएलगत्तै बाँके जिल्लाको खुला सीमा नाकाको फाइदा उठाउँदै अवैध तस्करी बढ्दै गएको स्थानीयले बताएका छन्।
विशेषगरी साईगाउँ सिमानाका हुँदै अवैध रूपमा विभिन्न वस्तु नेपाल भित्र्याउने गतिविधि तीव्र भएको प्रत्यक्षदर्शीहरूको भनाइ छ। अधिकांश घुम्वा काजमा बसेका छन्। स्थानीयका अनुसार सशस्त्र प्रहरी र नेपाल प्रहरीको प्रभावकारी निगरानी अभावका कारण उक्त क्षेत्रमा तस्करी मौलाउँदै गएको आरोप लगाइएको छ।
केही स्थानीयले सुरक्षाकर्मी र तस्करबीच मिलेमतो भएको आशंका पनि व्यक्त गरेका छन्। सुरक्षाकर्मीले रकम लिएर तस्करीलाई सहज बनाएको आरोप स्थानीयले लगाउँदै आएका छन्, जसका कारण राज्यको राजस्वमा ठूलो क्षति पुगेको उनीहरूको दाबी छ।
भारतबाट नेपाल ल्याइने माछा लगायतका वस्तुहरूलाई अनिवार्य जाँचपश्चात् मात्रै भित्र्याउने व्यवस्था भए पनि साईगाउँ नाकाबाट दैनिक रूपमा ठूलो परिमाणमा अवैध माछा भित्रिने गरेको स्थानीय बताउँछन्। यसका साथै भारतीय कपडा, हार्डवेयर सामग्री, टायल, खाद्यान्न, चिनी, दाल, तरकारी, बोइलर कुखुरा, काटेको मासु तथा नेपालमा प्रतिबन्धित मानिने मंगुर माछा समेत अवैध रूपमा नेपाल ल्याइने गरेको आरोप छ।
स्थानीयका अनुसार भारतबाट ल्याइएका सामानहरू पहिले साईगाउँ क्षेत्रमा भण्डारण गरिन्छ र त्यसपछि दिउँसो वा रातिको समयमा नेपालगञ्ज बजारतर्फ पठाइने गरिएको छ। जमुनाह, जयसपुर र बढैया क्षेत्रमा रहेका सशस्त्र प्रहरीका बीओपी तथा नेपाल प्रहरीलाई रकम दिएर तस्करहरूले अवैध सामान भित्र्याउने गरेको आरोप पनि लगाइएको छ।
नाम उल्लेख नगर्ने सर्तमा एक स्थानीयले साईगाउँ नाकाबाट दैनिक करिब लाखौं रुपैयाँभन्दा बढी मूल्यका सामान अवैध रूपमा नेपाल भित्रिने गरेको दाबी गरे। उनका अनुसार तस्करहरूले प्रायः राति ११ बजेदेखि बिहान ४ बजेसम्मको समयमा सामान ओसारपसार गर्ने गरेका छन्।
तस्करहरूले साईगाउँ क्षेत्रमा भण्डारण गरिएका सामानहरू पिकअप भ्यान, मोटरसाइकल, साइकल तथा अटोमार्फत रातिको समयमा नेपालगञ्ज बजारसम्म पु¥याउने गरेको बताइएको छ। केही स्थानीयले जिल्लाबाट खटिने घुमुवा प्रहरीमार्फत पनि तस्करबाट मासिक रूपमा रकम उठाइने गरेको आरोप लगाएका छन्।
स्थानीयले सीमा क्षेत्रमा कडाइका साथ निगरानी बढाएर अवैध तस्करी नियन्त्रण गर्न सम्बन्धित निकायसँग माग गरेका छन्। पावर र पहुँच भएका घुवुवाले लाइन लिएरै अवैध ओसारपसार फस्टाएको गुनासो छ ।
Discussion about this post