बाँके फागुन २७ गते ।
नेपाल–भारत सीमा क्षेत्रको जमुनाह नाका मानव बेचबिखनको उच्च जोखिममा रहेको पाइएको छ। यस नाकाबाट जोखिमपूर्ण यात्रामा भारततर्फ जाने महिलाहरूको संख्या बढ्दै गएपछि नाका अत्यधिक संवेदनशील बनेको हो।
मानव बेचबिखनको जोखिममा रहेको नेपालगन्जस्थित नेपाल–भारत सीमा नाका जमुनाहबाट हरेक वर्ष ठूलो संख्यामा महिला तथा बालिकाको उद्धार हुँदै आएको छ। उद्धार हुन नसकेका केही महिला तथा बालबालिका भने भारत प्रवेश गर्ने गरेको माइती नेपाल नेपालगन्ज शाखाले जनाएको छ।
माइती नेपाल नेपालगन्जका संयोजक केशव कोइरालाका अनुसार हरेक वर्ष ठूलो संख्यामा जोखिममा परेका महिला तथा बालबालिकाको उद्धार गरिए पनि यो क्रम अझै रोकिएको छैन। उनका अनुसार पछिल्लो एक वर्षको अवधिमा मात्रै बेचबिखनको जोखिममा रहेका एक हजार ५३८ जना महिला तथा बालबालिकालाई जमुनाह नाकाबाट उद्धार गरेर फिर्ता पठाइएको छ।
उद्धार गरिएका एक हजार ५३८ जनामध्ये ३३५ जना बाँके जिल्लाका महिला तथा बालबालिका रहेका थिए। माइती नेपालका अनुसार गत वर्ष कोहलपुरका ८० जना, बैजनाथका ६८, नेपालगन्जका ५६, खजुराका ४७, राप्तीसोनारीका ४५, जानकीका २०, नरैनापुरका १० र डुडुवाका ९ जना महिला तथा बालबालिकालाई जमुनाह नाकाबाट उद्धार गरिएको थियो।
त्यस्तै, सोही अवधिमा हराएका महिला तथा बालबालिकाको खोजतलास तथा उद्धारका लागि ८३३ वटा निवेदन परेकोमा ४३७ जना मात्रै फेला परेका छन् भने अन्यको खोजी जारी रहेको जनाइएको छ। तीमध्ये बाँके जिल्लाका मात्रै ११९ जना हराएकोमा ११४ जना फेला परेका थिए।
संयोजक कोइरालाले सामाजिक सञ्जाल, इन्टरनेटको पहुँच र आधुनिक प्रविधिको प्रयोगसँगै मानव बेचबिखनका तरिका र मार्ग परिवर्तन हुँदै गएको बताए। उनका अनुसार भारतीय सीमासँग जोडिएका पश्चिम नेपालका बाँके र बर्दिया जिल्ला मानव बेचबिखनको उच्च जोखिममा रहेका छन्।
Discussion about this post