सप्तरी चैत ४ गते ।
सप्तरीमा सात वर्षीया बालिकाको अपहरण गरी फिरौती माग्ने अभियुक्तलाई अदालतको आदेशपछि पुर्पक्षका लागि कारागार पठाइएको छ। सप्तरी जिल्ला अदालतको आदेशअनुसार अभियुक्तलाई राजविराजस्थित कारागार कार्यालय सप्तरीमा थुनामा राखिएको हो।
जिल्ला प्रहरी कार्यालय सप्तरीका अनुसार खडक नगरपालिका–८, बिसनपुरमा बस्दै आएका इमरान खानकी छोरी आसु खातुन (नेहा खातुन)लाई फागुन ५ गते साँझ करिब ७ बजे खडक नगरपालिका–९, सर्पा टोलका ३० वर्षीय इम्तियाज अहमदले मोटरसाइकलमा राखी अपहरण गरेका थिए। घटनापछि इलाका प्रहरी कार्यालय कल्याणपुर र जिल्ला प्रहरी कार्यालय सप्तरीबाट खटिएको संयुक्त टोलीले बालिकाको खोजतलास तीव्र बनाएको थियो।
प्रहरीले प्राविधिक तथा म्यानुअल दुवै माध्यमबाट अनुसन्धान अगाडि बढाइरहेको क्रममा फागुन ७ गते बिहान करिब ११ बजे अपहरणकारीले बालिकाका बुवासँग फोनमार्फत एक करोड रुपैयाँ नगद र पाँच किलो सुन फिरौती मागेका थिए। त्यसपछि रूपनी गाउँपालिका–१, खाँडो खोलामा बोलाइएपछि सादा पोशाकमा खटिएको प्रहरी टोलीले सोही दिन साँझ अभियुक्तलाई नियन्त्रणमा लिएको थियो।
पक्राउ परेका अहमदविरुद्ध अपहरण, शरीर बन्धक तथा मानव ओसारपसारसम्बन्धी कसूरमा मुद्दा दर्ता गरी थप अनुसन्धान अघि बढाइएको प्रहरीले जनाएको छ।
Discussion about this post