खजुरा क्षेत्रमा खेलकुद गतिविधि तीव्र, प्रतियोगिताको चहलपहल बढ्दो

बाँके चैत २५ गते ।
बाँकेको खजुरा क्षेत्रमा पछिल्लो समय खेलकुद गतिविधि उल्लेखनीय रूपमा बढ्दै गएको छ। ग्रामीण भेगमा नियमित रूपमा आयोजना भइरहेका प्रतियोगिताले नयाँ खेलाडी उत्पादनमा टेवा पु¥याउनुका साथै दर्शकको आकर्षणसमेत बढाएको देखिएको छ।

खजुरा गाउँपालिका–४ स्थित ई–गाउँमा जारी अर्जुन रोका स्मृति क्रिकेट प्रतियोगिता प्रति दर्शकको उत्साह उच्च देखिएको छ। प्रतियोगिता अवलोकन गर्न मध्यरातिसम्म दर्शकको उपस्थिति रहने गरेको आयोजकले जनाएको छ। अर्जुन रोका स्मृति प्रतिष्ठान र न्यू दर्पण युवा स्पोर्टस क्लबको संयुक्त आयोजनामा भइरहेको उक्त प्रतियोगितामा जिल्लाका १७ युवा क्लब सहभागी छन्।

यसैगरी, खजुरा–२ सितापुरमा योगिनी युवा क्लबको आयोजनामा दोस्रो योगिनी गोल्ड कप फुटबल प्रतियोगिता सञ्चालनमा रहेको छ, जसमा बाँके र बर्दियाका १३ टिमले प्रतिस्पर्धा गरिरहेका छन्। केही दिनअघि खजुरा–४ डिगाउँमा फाइभ–ए–साइड रात्रिकालीन फुटबल तथा खजुरा–५ उढरापुरमा रात्रिकालीन क्रिकेट प्रतियोगिता सम्पन्न भएका थिए।

आगामी चैत ३० गतेदेखि खजुरा–४ डि–गाउँस्थित मिनी रंगशालामा खजुरा गोल्ड कप फुटबल प्रतियोगिता आयोजना हुने भएको छ। प्रतियोगिता न्यू डाँफे स्पोर्टस क्लब खजुराको आयोजनामा हुने जनाइएको छ।