बाँके, असार ११ गते ।
बाँकेको जानकी गाउँपालिकामा निर्माणाधीन १५ शय्याको अस्पताल भवनको निर्माण कार्य सम्पन्न भएको छ। भवन निर्माण सम्पन्न भएसँगै आगामी आर्थिक वर्षदेखि अस्पतालबाट नियमित स्वास्थ्य सेवा सञ्चालन गरिने गाउँपालिका अध्यक्ष छब्बन खाँ ले जानकारी दिए।
अध्यक्ष खाँका अनुसार अस्पताल सञ्चालनमा आएपछि सामान्य उपचारदेखि मातृ तथा शिशु स्वास्थ्य सेवासम्मका लागि स्थानीयवासीले सदरमुकाम नेपालगञ्ज धाउनुपर्ने बाध्यता अन्त्य हुनेछ। उनले गाउँमै गुणस्तरीय स्वास्थ्य सेवा उपलब्ध हुँदा नागरिकको जीवनस्तर सुधार हुनुका साथै बसाइँसराइको प्रवृत्तिमा समेत कमी आउने विश्वास व्यक्त गरे।
गाउँपालिकाका प्रमुख प्रशासकीय अधिकृत परशुराम उपाध्यायले अस्पताल सञ्चालन तथा सेवा विस्तारका लागि आगामी आर्थिक वर्षमा पर्याप्त बजेट व्यवस्था गरिएको बताए। उनका अनुसार ग्रामीण बस्तीका नागरिकलाई सहज, सुलभ र गुणस्तरीय स्वास्थ्य सेवा स्थानीय तहमै उपलब्ध गराउने उद्देश्यका साथ आवश्यक तयारी अघि बढाइएको छ।
गाउँपालिकाले अस्पताल सञ्चालनको प्रारम्भिक चरणमै प्रसूति सेवा सुरु गर्ने तयारी गरेको जनाएको छ। अन्य स्वास्थ्य सेवाहरू पनि क्रमशः विस्तार गर्दै लैजाने योजना रहेको छ। अस्पताल सञ्चालनमा आएपछि जानकी गाउँपालिकावासीले विशेषज्ञसहितको स्वास्थ्य सेवा आफ्नै क्षेत्रमा प्राप्त गर्ने अपेक्षा गरिएको छ।
१५ शय्याको उक्त अस्पताल भवन निर्माणको जिम्मा निर्माण कम्पनी हिम सगरमाथा–अनका जेभीले लिएको थियो। विसं २०७८ माघमा ११ करोड ४४ लाख रुपैयाँ लागतमा निर्माण सम्झौता गरिएको यो परियोजना हाल सम्पन्न भएको हो।
गाउँपालिकाका प्रवक्ता टीकानाथ यादवका अनुसार सात हजार २६३ घरधुरी र ४६ हजार ५३६ जनसङ्ख्या रहेको जानकी गाउँपालिकाका नागरिकले सामान्य स्वास्थ्य उपचारका लागि समेत हालसम्म नेपालगञ्ज तथा अन्य स्थान पुग्नुपर्ने अवस्था रहेको छ।
अस्पताल भवन निर्माण सम्पन्न भएपछि स्थानीयवासीमा सहज स्वास्थ्य सेवाप्रतिको आशा र भरोसा बढेको छ। जानकी–४ का स्थानीय अगुवा पदमबहादुर धिताल ले सुविधा सम्पन्न अस्पताल भवनबाट गाउँपालिकावासीले सहज र सुलभ स्वास्थ्य सेवा पाउने अपेक्षा व्यक्त गर्दै सेवा सञ्चालनलाई प्रभावकारी बनाउन गाउँपालिकाले आवश्यक ध्यान दिनुपर्ने बताए।
त्यसैगरी जानकी–१ का स्थानीयवासी दिनेश मौर्य ले गाउँमै स्वास्थ्य सेवा उपलब्ध हुने खबरले खुशी लागेको बताउँदै सेवा गुणस्तरीय बनाउन दक्ष जनशक्ति र आवश्यक पूर्वाधार व्यवस्थापनमा विशेष ध्यान दिन आग्रह गरे।
Discussion about this post