बाँके, साउन १२ गते ।
बाँकेको खजुरास्थित सुशील कोइराला प्रखर क्यान्सर अस्पतालमा बिरामी र उनका कुरुवालाई लक्षित गर्दै १५ कोठे अत्याधुनिक बिरामी कुरुवा घर सञ्चालनमा आएको छ।
अस्पतालका निर्देशक डा. निरज भट्टराईका अनुसार लायन्स क्लब नेपालगञ्ज–खजुराको सहकार्यमा निर्माण गरिएको कुरुवा घर सञ्चालनमा ल्याइएको हो। लामो समयसम्म उपचार गराइरहेका क्यान्सर बिरामीका आफन्त र कुरुवाले बसोबास तथा खानपानका क्रममा भोग्दै आएको समस्या समाधान गर्ने उद्देश्यले यो सेवा सुरु गरिएको उनले बताए।
उनका अनुसार कुरुवाले न्यूनतम शुल्कमा सुरक्षित र सुविधासम्पन्न कोठा प्रयोग गर्न सक्नेछन्। प्रत्येक कोठामा टेलिभिजन, एट्याच बाथरुम तथा २४सै घण्टा निःशुल्क उच्च गतिको इन्टरनेट सेवाको व्यवस्था गरिएको छ।
कुरुवा घरको सञ्चालन र व्यवस्थापनलाई व्यवस्थित बनाउन अस्पतालले चार सदस्यीय व्यवस्थापन समिति गठन गरेको छ। समितिको संयोजकमा डा. सुवास मेहता रहेका छन् भने सदस्यमा पूजा उपाध्याय, राजेश रिजाल र भुवन खनाल छन्।
अस्पतालका अनुसार पश्चिम नेपालका विभिन्न दुर्गम जिल्लाका साथै छिमेकी मुलुक भारतबाट समेत ठूलो संख्यामा क्यान्सरका बिरामी उपचारका लागि यहाँ आउने गरेका छन्। उपचार अवधिभर बिरामीका साथमा रहने कुरुवाको बसाइ सहज बनाउने उद्देश्यले यो सुविधा सञ्चालनमा ल्याइएको हो।
निर्देशक डा. भट्टराईले अस्पताललाई थप जनमुखी, सेवामुखी र गुणस्तरीय बनाउने अभियान जारी रहेको उल्लेख गर्दै आगामी दिनमा सेवा विस्तार र पूर्वाधार सुधारलाई निरन्तरता दिइने बताए।
खजुराका नागरिक अगुवा महेन्द्र मल्लले चितवनको भरतपुरदेखि पश्चिम नेपालसम्म क्यान्सर उपचारका लागि सुशील कोइराला प्रखर क्यान्सर अस्पताल नै एकमात्र विशेषज्ञ अस्पताल भएको बताए। अस्पताल सञ्चालनमा आएपछि पश्चिम नेपालका बिरामीले उपचारका लागि भरतपुर वा भारत जानुपर्ने बाध्यता उल्लेखनीय रूपमा घटेको उनको भनाइ छ।
उनले अस्पतालमा चिकित्सक तथा स्वास्थ्यकर्मीको पर्याप्त सरकारी दरबन्दी कायम गर्न र अत्याधुनिक उपचार उपकरण थप गर्न सरकारको ध्यानाकर्षण गराए।
Discussion about this post