बाँके, साउन १६ गते ।
सुनसरी घटनापछि उत्पन्न परिस्थितिप्रति दुःख व्यक्त गर्दै समाजसेवी तथा नेपालगन्जका व्यवसायी मेराज अहमद हिमालयले राष्ट्रिय एकता, सामाजिक सद्भाव र संयमता कायम राख्न अपिल गरेका छन्।
हिमालयले घटनामा ज्यान गुमाएका नेपालीप्रति श्रद्धाञ्जली अर्पण गर्दै घाइतेहरूको शीघ्र स्वास्थ्यलाभको कामना गरेका छन्। साथै, घटनाका क्रममा आगजनी, तोडफोड तथा हिंसाबाट घर, व्यवसाय र सम्पत्तिमा क्षति बेहोरेका नागरिकलाई तत्काल राहत, उचित क्षतिपूर्ति र पुनःस्थापनाको व्यवस्था गर्न सरकारसँग माग गरेका छन्।
उनले घटनामा संलग्न दोषीको पहिचान जात, धर्म, समुदाय, वर्ग, लिंग वा राजनीतिक पहुँचका आधारमा नभई निष्पक्ष अनुसन्धानबाट हुनुपर्ने बताएका छन्। दोषी जोसुकै भए पनि कानुनबमोजिम कारबाही गर्नुपर्ने उनको माग छ।
हिमालयले हिंसा भड्काउने, सामाजिक विभाजन बढाउने र शान्ति तथा सद्भावमा आघात पु¥याउने गतिविधिप्रति सचेत रहन नागरिकलाई आग्रह गरेका छन्। उनका अनुसार अफवाह, उक्साहट र कुनै समूहको स्वार्थको साधन बन्ने प्रवृत्तिले समाजमा अविश्वास र द्वन्द्व बढाउन सक्छ।
‘हामी सबैभन्दा पहिले नेपाली हौँ,’ उनले भनेका छन्, ‘त्यसपछि मात्र हाम्रो धर्म, जात, भाषा, संस्कृति वा समुदायको पहिचान आउँछ। हाम्रो साझा पहिचान र मातृभूमि नेपाल हो।’
उनले नेपाली समाज लामो समयदेखि आपसी मेलमिलाप र सहअस्तित्वमा अघि बढ्दै आएको उल्लेख गर्दै समुदायबीच फाटो ल्याउने कुनै पनि प्रयास देशको हितमा नहुने बताएका छन्।
धर्मका नाममा हुने हिंसाप्रति पनि उनले आपत्ति जनाएका छन्। धर्मले घृणा, हिंसा र निर्दोषको रगत बगाउन नसिकाउने उल्लेख गर्दै उनले धर्मको नाममा हिंसा फैलाउने गतिविधिले अन्ततः निर्दोष नागरिकलाई नै पीडा दिने बताएका छन्।
‘ज्यान गुमाउने पनि हाम्रै दाजुभाइ, घाइते हुने पनि हाम्रै आफन्त र जल्ने सम्पत्ति पनि हाम्रै नेपालीहरूको हुन्छ,’ उनको अपिलमा भनिएको छ।
हिमालयले कुनै पनि किसिमको ‘प्रोक्सी’ गतिविधि वा बाह्य स्वार्थको प्रभावमा परी नेपाली–नेपालीबीच विभाजन र द्वन्द्व सिर्जना नगर्न आग्रह गरेका छन्। उनले अफवाह र घृणात्मक अभिव्यक्तिको पछि नलागी सत्य–तथ्य बुझ्न, कानुनको सम्मान गर्न र राष्ट्रिय एकताको पक्षमा उभिन सबैलाई आग्रह गरेका छन्।
उनले शान्त, सुरक्षित र समृद्ध नेपाल निर्माणका लागि संयमता, आपसी सम्मान, राष्ट्रिय एकता, सद्भाव र कानुनप्रतिको विश्वासलाई बलियो बनाउनुपर्ने बताएका छन्।
‘आफ्नै घरमा आगो लगाएर कसैले पनि उज्यालो पाउँदैन,’ हिमालयले भनेका छन्, ‘त्यसले केवल आफ्नै भविष्यलाई खरानी बनाउँछ।’
अपिलको अन्त्यमा उनले राष्ट्रिय एकता, शान्ति, सद्भाव र भाइचारा कायम राख्न सबै नेपालीलाई आह्वान गरेका छन्।
Discussion about this post