बाँके, भदौ ७ गते ।
बैजनाथ गाउँपालिकाले किशोरीमा देखिने रक्तअल्पता (एनिमिया) नियन्त्रणका लागि विद्यालयस्तरमै स्वास्थ्य जाँच सुरु गरेको छ। गाउँपालिकाले चालु आर्थिक वर्षदेखि स्वास्थ्यकर्मीको टोली विद्यालयमा पठाएर छात्राको रगतमा हेमोग्लोबिनको मात्रा परीक्षण गर्न थालेको हो।
परीक्षणका क्रममा समस्या देखिएका किशोरीलाई आवश्यक परामर्श र उपचारको व्यवस्था गरिने गाउँपालिकाले जनाएको छ। गाउँपालिका उपाध्यक्ष निर्मला रोकायले किशोरीको स्वास्थ्य सुधारसँगै भविष्यमा मातृ मृत्युदर घटाउने उद्देश्यले कार्यक्रम सुरु गरिएको बताइन्।
गर्भवती महिलाको स्वास्थ्य जाँचका लागि गाउँपालिकाले आन्तरिक स्रोतबाट निःशुल्क भिडियो एक्सरे (अल्ट्रासाउन्ड) सेवा पनि सञ्चालनमा ल्याएको छ। अल्ट्रासाउन्डमा जोखिम देखिए तत्काल विशेषज्ञ अस्पतालमा रेफर गर्ने व्यवस्था गरिएको रोकायले बताइन्।
गाउँपालिकाले सुत्केरी, अपाङ्गता भएका व्यक्ति र ज्येष्ठ नागरिकका लागि निःशुल्क एम्बुलेन्स सेवा सञ्चालन गरेको छ। बर्थिङ सेन्टरमा प्रयोगशाला सुविधा पनि विस्तार गरिएको छ।
स्वास्थ्य शाखा प्रमुख लक्ष्मण शाहीका अनुसार गाउँपालिकाका आठवटै वडामा स्वास्थ्य संस्था सञ्चालनमा छन्। बनकटवा प्राथमिक स्वास्थ्य केन्द्रमा चिकित्सकसहितको टोली कार्यरत रहेको उनले बताए। उनका अनुसार चिसापानी, नौवस्ता र टिटिहिरियामा स्वास्थ्य चौकी तथा अन्य वडामा आधारभूत स्वास्थ्य केन्द्र सञ्चालनमा छन्।
सङ्क्रमण तथा विपद् व्यवस्थापनका लागि पालिका र वडास्तरमा ‘रेपिड रेस्पोन्स टिम’ परिचालन गरिएको शाहीले बताए।
सामाजिक विकास समिति संयोजक भूमिसरा रानाले सीमान्तकृत समुदाय, आमा र शिशुको स्वास्थ्यलाई प्राथमिकतामा राखेर सेवा विस्तार गरिएको बताइन्। उनका अनुसार स्वास्थ्यकर्मी र महिला स्वास्थ्य स्वयंसेविकामार्फत घरदैलोमै पुगेर स्वास्थ्यसम्बन्धी सेवा र परामर्श दिने गरिएको छ।
Discussion about this post