बाँके, भदौ २९ गते ।
जिल्लामा गत आर्थिक वर्षमा दर्ता भएका नयाँ घरेलु उद्योग तथा वाणिज्य फर्मबाट २ हजार ८ सयभन्दा बढी नयाँ रोजगारी सिर्जना भएको छ ।
घरेलु तथा साना उद्योग कार्यालय बाँकेका अनुसार आर्थिक वर्ष २०८२÷८३ मा उद्योग तथा वाणिज्य प्रशासनअन्तर्गत दर्ता भएका ६२७ उद्योग र ६२६ वाणिज्य फर्मबाट २ हजार ८६१ जनाले रोजगारी पाएका छन् ।
कार्यालयका निमित्त प्रमुख उद्योग अधिकृत मोहन घर्तिमगरका अनुसार सिर्जित रोजगारीमध्ये १ हजार ६८८ पुरुष र १ हजार १७३ महिला छन् । यही अवधिमा ४३६ पुरुष र २३७ महिला गरी ६७३ जना नयाँ उद्यमी थपिएका छन् ।
गत आर्थिक वर्षमा ६२७ नयाँ उद्योग दर्ता भएसँगै बाँकेमा दर्ता भएका उद्योगको कुल संख्या १५ हजार ८०७ पुगेको छ । यस अवधिमा १ हजार १०१ उद्योग नवीकरण भएका छन् भने २६५ उद्योग खारेज भएका छन् ।
आर्थिक वर्ष २०८१÷८२ मा बाँकेमा ६५७ उद्योग दर्ता, १ हजार ४२ उद्योग नवीकरण र ३०९ उद्योग खारेज भएका थिए ।
वाणिज्यतर्फ गत आर्थिक वर्षमा ६२६ नयाँ फर्म दर्ता भएका छन् । यससँगै जिल्लामा दर्ता भएका वाणिज्य फर्मको कुल संख्या २१ हजार ९८० पुगेको कार्यालयले जनाएको छ । एक हजार ६८८ फर्म नवीकरण भएका छन् भने ३५६ फर्म खारेज भएका छन् ।
अघिल्लो आर्थिक वर्षमा ७१२ वाणिज्य फर्म दर्ता, १ हजार ६६१ नवीकरण र ५२७ फर्म खारेज भएका थिए ।
व्यवसायको नियमन तथा गुणस्तर कायम गर्न कार्यालयले गत आर्थिक वर्षमा सात पटक बजार अनुगमन र ११ पटक उद्योग निरीक्षण गरेको घर्तिमगरले बताए ।
कार्यालयका लागि गत आर्थिक वर्षमा ३ करोड ३ लाख ९२ हजार रुपैयाँ बजेट विनियोजन भएको थियो । त्यसमध्ये २ करोड २५ लाख १२ हजार ९५० रुपैयाँ खर्च भएको छ । कार्यालयको कुल वित्तीय प्रगति ७४ दशमलव ०८ प्रतिशत रहेको घर्तिमगरले बताए ।
गत आर्थिक वर्षमा कार्यालयले १ करोड ६३ लाख ७ हजार ७९५ रुपैयाँ राजस्व संकलन गरेको छ । अघिल्लो आर्थिक वर्षमा १ करोड ९७ लाख ३१ हजार ७८५ रुपैयाँ राजस्व संकलन भएको थियो ।
राजस्व घट्नुमा उद्योग तथा वाणिज्य फर्मको नयाँ दर्तामा आएको सामान्य शिथिलता, स्थानीय तहबाट दर्ता प्रक्रिया सुरु हुनु, प्रदेश सरकारले उपलब्ध गराएको छुट सुविधा तथा फर्म र उद्योग खारेजी बढ्नु मुख्य कारण रहेको घर्तिमगरले बताए ।
Discussion about this post