बाँके, भदौ ३० गते ।
भारतको रुपैडिहा प्रहरीले लागूऔषधसम्बन्धी मुद्दामा पक्राउ गरेका सुदर्शन न्युजका पत्रकार बताइएका रामजी सोनीलाई बहराइचस्थित रिमान्ड मजिस्ट्रेटको अदालतले २० हजार रुपैयाँको व्यक्तिगत बन्धपत्रमा रिहा गर्न आदेश दिएको छ।
रुपैडिहा प्रहरीले सोनीलाई १४ दिन न्यायिक हिरासतमा राखेर अनुसन्धान गर्न अनुमति मागेको थियो। तर, रिमान्ड मजिस्ट्रेट पुष्पेन्द्र सिंहको इजलासले तत्काल हिरासतमा राख्न पर्याप्त आधार र प्रमाण नदेखिएको भन्दै प्रहरीको रिमान्ड निवेदन अस्वीकार गरेको हो।
अदालतको आदेशअनुसार सोनीको लागूऔषध कारोबारमा संलग्नता पुष्टि हुने पर्याप्त प्रमाण प्रहरीले पेस गर्न सकेन। अनुसन्धानका क्रममा एक महिलाको बयानलाई आधार बनाइए पनि त्यसको सत्यता पुष्टि गर्ने प्रमाण, साक्षी तथा अडियो–भिडियो रेकर्डसमेत केस डायरीमा नरहेको अदालतले जनाएको छ।
प्रहरीका अनुसार गत ६ सेप्टेम्बरमा रुपैडिहा प्रहरी र सशस्त्र सीमा बल (एसएसबी)को संयुक्त टोलीले दशहरा बाग क्षेत्रमा ११६ ग्राम स्म्याकसहित शकीला बीबीलाई पक्राउ गरेको थियो। सोही घटनामा सोनीको संलग्नता रहेको दाबी गर्दै प्रहरीले उनलाई पक्राउ गरेको हो।
प्रहरीले सोनीमाथि लागूऔषध कारोबारमा संलग्न व्यक्तिसँग बार्गेनिङ गरेको र समाचार प्रकाशन नगर्ने भन्दै रकम मागेको आरोप लगाएको थियो। शकीला बीबीको बयानमा सोनीले दुईपटक २०–२० हजार रुपैयाँ लिएको र कार्यालयमा एसी जडान गरिदिन माग गरेको उल्लेख रहेको प्रहरीले जनाएको थियो।
तर, अदालतले रकम लेनदेन पुष्टि गर्ने थप प्रमाण तथा स्वतन्त्र साक्षी पेस नभएको भन्दै तत्काल हिरासतमा राख्न पर्याप्त आधार नदेखिएको जनाएको छ। सोनीलाई अनुसन्धानमा सहयोग गर्ने, प्रमाण तथा साक्षी प्रभावित नगर्ने र बोलाएको अवस्थामा उपस्थित हुने सर्तमा बन्धपत्रमा रिहा गरिएको हो।
‘बिना प्रमाण जेल पठाइयो’
रिहाइपछि सोमबार रुपैडिहास्थित सरस्वती विद्या मन्दिरमा पत्रकार सम्मेलन गर्दै सोनीले आफूलाई कुनै ठोस प्रमाणविना पक्राउ गरी जेल पठाइएको दाबी गरे। आफ्नो साथबाट कुनै आपत्तिजनक सामग्री बरामद नभएको र अदालतमा पनि प्रहरीले आफूमाथिको आरोप पुष्टि हुने प्रमाण पेस गर्न नसकेको उनको भनाइ छ।
आफूमाथि आरोप लगाउने महिलाविरुद्ध ३० लाख रुपैयाँको मानहानि मुद्दा दायर गर्ने चेतावनीसमेत उनले दिएका छन्। तोकिएको समयभित्र आरोप प्रमाणित गर्न नसके कानुनी प्रक्रिया अघि बढाउने उनले बताए।
प्रहरीमाथि ‘लागूऔषध कारोबारी संरक्षण’को आरोप
पत्रकार सम्मेलनमा सोनीले रुपैडिहामा लागूऔषध कारोबारीलाई भारतीय प्रहरीले नै संरक्षण गरिरहेको गम्भीर आरोपसमेत लगाए। आफूलाई फसाउन खोजिएको दाबी गर्दै उनले प्रहरीको भूमिकामाथि प्रश्न उठाएका हुन्।
तर, प्रहरीले लागूऔषध कारोबारीलाई संरक्षण गरेको भन्ने सोनीको आरोपको पुष्टि भएको छैन। अदालतले पनि प्रहरीमाथि त्यस्तो आरोप पुष्टि गरेको छैन। अदालतको आदेश तत्काल न्यायिक हिरासतमा राख्न पर्याप्त प्रमाण नदेखिएको विषयमा केन्द्रित छ।
प्रहरीका अनुसार सोनीविरुद्ध सन् २०२१ र २०२२ मा समेत विभिन्न आपराधिक मुद्दा दर्ता भएको अभिलेख छ। ती मुद्दाको वर्तमान अवस्थाबारे भने प्रहरीले विस्तृत जानकारी दिएको छैन।
सोनीले भविष्यमा आफूलाई अन्य मुद्दामा फसाउने षड्यन्त्र हुन सक्ने आशंका पनि व्यक्त गरेका छन्। पत्रकार सम्मेलनमा भारतको रुपैडिहा र नेपालगन्जका पत्रकारसहित रुपैडिहा नगर पञ्चायतका अध्यक्ष डा. उमाशंकर वैश्य, व्यापार मण्डलका अध्यक्ष शैलेश जयसवाललगायतको उपस्थिति थियो। सहभागीले घटनाको निष्पक्ष छानबिनको माग गरेका छन्।
अदालतले सोनीलाई बन्धपत्रमा रिहा गरे पनि उनीमाथि लागेको लागूऔषधसम्बन्धी आरोपको अन्तिम निरुपण भएको छैन। त्यस्तै, प्रहरीमाथि सोनीले लगाएको संरक्षणको आरोप पनि पुष्टि हुन बाँकी छ। दुवै पक्षका दाबीमाथि थप अनुसन्धान र प्रमाणका आधारमा कानुनी प्रक्रिया अघि बढ्नेछ।
यो समाचार पनि पढ्नुहोस्
लागूऔषध मुद्दामा पक्राउ परेका पत्रकार सोनी २० हजारको बन्धपत्रमा रिहा
Discussion about this post