बाँके, असोज ५ गते ।
नेपालगन्जको धार्मिक तथा सांस्कृतिक पहिचानसँग जोडिएको ऐतिहासिक रामलिलाको १५९औँ शृङ्खला यस वर्ष घटस्थापनादेखि मञ्चन हुने भएको छ ।
दसैँको अवसरमा १५८ वर्षदेखि निरन्तर हुँदै आएको रामलिला गत वर्ष ‘जेनजी’ आन्दोलनका कारण सञ्चालन हुन सकेको थिएन । यस वर्ष भने घटस्थापनादेखि पुनः रामलिला मञ्चन गर्ने तयारी गरिएको रामलिला सञ्चालक समितिका अध्यक्ष सन्तोषकुमार कानोडियाले बताए ।
उनका अनुसार नेपालगन्जस्थित रामलिला मैदानमा असोज २५ गते घटस्थापनाका दिनदेखि दस दिनसम्म रामलिला मञ्चन गरिनेछ । रामलिलाको शुभारम्भ शोभायात्रासहित गरिने उनले बताए ।
‘रामलिला नेपालगन्जको संस्कृति र पहिचानसँग जोडिएको परम्परा हो,’ उनले भने, ‘परिस्थितिका कारण एक वर्ष नियमित मञ्चन प्रभावित भए पनि यसको निरन्तरता रोक्नुहुँदैन भन्ने उद्देश्यले तयारी अघि बढाएका छौँ ।’
उनका अनुसार यस वर्षको रामलिलालाई थप व्यवस्थित, प्रभावकारी र भव्य बनाउने तयारी भइरहेको छ । त्यसका लागि समितिले विभिन्न उपसमितिसमेत गठन गरेर काम अघि बढाएको उनले बताए ।
रामलिला मञ्चनका लागि भारतको वृन्दावनबाट राधा रमणको नेतृत्वमा कलाकार टोली नेपालगन्ज आउने भएको छ । उक्त टोलीले रामायणका प्रमुख प्रसङ्ग तथा भगवान् राम र सीताको जीवनसँग सम्बन्धित विभिन्न कथालाई नाटकीय शैलीमा प्रस्तुत गर्नेछ ।
समितिका अनुसार घटस्थापनादेखि विजयादशमीसम्म प्रत्येक दिन साँझ ८ बजेदेखि राति १२ बजेसम्म रामलिला मञ्चन हुनेछ । वृन्दावनबाट आउने कलाकारले विभिन्न पात्रको भूमिका निर्वाह गर्दै रामायणका प्रमुख घटनाक्रमलाई रङ्गमञ्चमार्फत प्रस्तुत गर्नेछन् ।
नेपालगन्जमा लामो समयदेखि निरन्तर सञ्चालन हुँदै आएको रामलिला धार्मिक कार्यक्रम मात्र नभई सहरको सांस्कृतिक पहिचानका रूपमा समेत स्थापित भएको समितिले जनाएको छ । रामलिलालाई आगामी वर्षमा पनि निरन्तरता दिँदै थप व्यवस्थित बनाउने तयारी गरिएको अध्यक्ष कानोडियाले बताए ।
Discussion about this post