बाँके, असोज १२ गते ।
आगामी मंसिर १६ देखि २७ गतेसम्म कर्णाली प्रदेशको सुर्खेतमा हुने दसौं राष्ट्रिय खेलकुद प्रतियोगिताका करिब ६ वटा खेल नेपालगन्जमा सञ्चालन गर्ने तयारी गरिएको छ ।
सम्भावित खेलस्थल र पूर्वाधारको अवस्थाबारे जानकारी लिन शिक्षा तथा खेलकुद मन्त्रालयका सचिव चुडामणि पौडेलको नेतृत्वमा आएको टोलीले सोमबार नेपालगन्ज रंगशालाको निरीक्षण तथा अनुगमन गरेको छ ।
दसौं राष्ट्रिय खेलकुदको तयारीका क्रममा सुर्खेत पुगेको मन्त्रालयको टोली फर्किने क्रममा नेपालगन्ज आएको साबिक मध्यपश्चिमाञ्चल क्षेत्रीय खेलकुद विकास समितिका प्रमुख महेश चन्दले बताए ।
उनका अनुसार टोलीले नेपालगन्ज रंगशालामा रहेका विभिन्न खेल पूर्वाधारको अवस्थाबारे जानकारी लिनुका साथै सम्भावित खेल सञ्चालन गर्ने स्थलको निरीक्षण गरेको हो ।
‘मुख्य मैदान, पौडी पोखरी, सुटिङ रेन्ज, कभर्ड हललगायतका खेलस्थलको निरीक्षण गरिएको छ,’ उनले भने, ‘दसौं राष्ट्रिय खेलकुदका करिब ६ वटा खेल नेपालगन्जमा सञ्चालन गर्ने गरी तयारी गर्नुपर्ने विषयमा छलफल भएको छ ।’
निरीक्षणका क्रममा मन्त्रालयका सचिव पौडेल, सहसचिव रमेश ढकाललगायतको टोलीले रंगशालामा रहेका खेल पूर्वाधारको अवस्था र प्रतियोगिता सञ्चालनका लागि आवश्यक तयारीबारे जानकारी लिएको थियो ।
साबिक मध्यपश्चिमाञ्चल क्षेत्रीय खेलकुद विकास समितिका कार्यालय प्रमुख चन्दले टोलीलाई नेपालगन्ज रंगशालामा रहेका खेलस्थल तथा पूर्वाधारबारे जानकारी गराएका थिए ।
नेपालगन्जमा आठौं राष्ट्रिय खेलकुद प्रतियोगिता आयोजना हुँदा ठूलो लगानीमा विभिन्न खेल पूर्वाधार निर्माण गरिएको थियो । तर, नियमित संरक्षण र रेखदेखका लागि पर्याप्त बजेट नहुँदा ती पूर्वाधारको अवस्था कमजोर बन्दै गएको छ ।
नेपालगन्जमा दसौं राष्ट्रिय खेलकुदका केही खेल सञ्चालन भएमा प्रतियोगिता आयोजनासँगै यहाँका खेल पूर्वाधारको उपयोग, संरक्षण र रेखदेखमा समेत सहयोग पुग्ने अपेक्षा गरिएको छ ।
प्रतियोगिताका लागि नेपालगन्जमा सञ्चालन गरिने खेल र आवश्यक तयारीबारे सम्बन्धित निकायबीच थप समन्वय गरिने बताइएको छ ।
Discussion about this post