काठमाडौं असोज १८ गते ।
दसैँ, तिहारलगायतका चाडपर्व नजिकिएसँगै काठमाडौं उपत्यकाबाट घर फर्किने यात्रुको चाप बढ्न थालेको छ । चाडपर्व मनाउन उपत्यकाबाट आठ लाखभन्दा बढी नागरिक बाहिरिने अनुमान गरिएको छ ।
काठमाडौं उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीले घर फर्किने यात्रुको सङ्ख्या क्रमशः बढ्दै गएको बताए ।
उनका अनुसार चाडपर्वका समयमा यात्रुको चाप बढ्ने भएकाले उपत्यकाका प्रमुख बसपार्क र बाहिरिने नाकामा चहलपहल बढेको छ ।
नेपाल राष्ट्रिय यातायात व्यवसायी महासङ्घका अध्यक्ष पुण्यप्रसाद सिटौलाले यात्रुको चापअनुसार नियमित सेवासँगै आवश्यकताअनुसार थप सवारीसाधन सञ्चालनको तयारी गरिएको बताए ।
चाडपर्वमा यात्रुको चाप बढ्ने भएकाले टिकट बिक्री, भाडादर, सवारीसाधनको अवस्था र यात्रुको सुरक्षामा निगरानी बढाइएको छ । यात्रुलाई आधिकारिक काउन्टरबाट टिकट लिन र तोकिएको भाडादर मात्रै तिर्न आग्रह गरिएको छ ।
ट्राफिक प्रहरीले उपत्यकाका मुख्य सडक र बाहिरिने नाकामा ट्राफिक व्यवस्थापन प्रभावकारी बनाउन आवश्यक जनशक्ति परिचालन गर्ने जनाएको छ । बढी भाडा असुली, क्षमताभन्दा बढी यात्रु बोक्ने र असुरक्षित रूपमा सवारी सञ्चालन गर्ने गतिविधिमाथि समेत निगरानी बढाइनेछ ।
सम्बन्धित निकायले यात्रुलाई अग्रिम टिकटको व्यवस्था गर्न, सवारीसाधनको अवस्था बुझेर यात्रा गर्न र यात्राका क्रममा सावधानी अपनाउन आग्रह गरेका छन् ।
Discussion about this post